GURRUOD

Ti napigsa a daranudor a sumaruno iti panaggilap ti kimat. Gapu dayta iti giddato nga ibubullong ti angin a napapudot gapu iti kasta a panagparuar iti koriente, a pakaigapuan ti narungsot nga isisiasi ti angin iti dana ti kimat ket kalpasanna agsubli manen iti likudan dayta.​—Job 28:26; 38:25.

Ti Hebreo a berbo a ra·ʽamʹ (kaipapananna ti “gurruod”) madakamat no dadduma mainaig ken Jehova (1Sm 2:10; 2Sm 22:14; Sal 18:13), Daydiay a nangaramat no dadduma iti gurruod a pangitungpal iti pagayatanna. Kas pagarigan, idi tiempo ni Samuel, riniribuk ni Jehova dagiti Filisteo babaen iti gurruod (Heb., raʹʽam). (1Sm 7:10; idiligyo ti Isa 29:6.) Ti sabali pay a Hebreo a sao, qohl, no maminsan maipatarus a “gurruod” (1Sm 12:17, 18, Rbi8 ftn), kangrunaan a kaipapananna ti “uni” (Ex 32:18, 19) wenno “timek.”​—De 21:18; 1Ar 19:12.

Ti nakaam-amak nga uni ti gurruod nainaig iti timek ni Jehova. (Job 37:4, 5; 40:9; Sal 29:3-9) Idi a ti sumagmamano a Judio nangngegda a ni Jehova nagsao manipud langit ken Jesus, adda nagduduma a kapanunotan no ti uni ket gurruod wenno timek ti maysa nga anghel. (Jn 12:28, 29; idiligyo ti Apo 6:1; 14:2; 19:6.) Yantangay ti uni ti gurruod masansan a pakpakauna a pasimudaag ti sumungsungad a bagyo, dagiti “gurruod” maipatuldoda dagiti nadibinuan a pakdaar, kas iti Apocalipsis 8:5; 10:3, 4; 16:18.

Kadagiti Judio iti sakaanan ti Bantay Sinai, ti nangngegda a gurruod ket parangarang ti kaadda ti Dios. (Ex 19:16; idiligyo ti Apo 4:5; 11:19.) Mabalin a daytoy a pasamak wenno ti panangi turong ti Dios iti Israel babaen iti munmon nga ulep (maysa a lugar ti gurruod) ti iparparipirip ti sasao ti salmista: “Rinugianka [ni Jehova] a sungbatan iti natalimeng a lugar ti gurruod.”​—Sal 81:7.