KARESON

Ti kareson kadagidi kadaanan a tiempo ket simple a lugan, kadawyanna a naaramid iti kayo, nga addaan iti nagrayos wenno solido a pilpilid. (1Sm 6:14) Ti sumagmamano a kareson ket dakdakkel bassit ngem iti dua-ti-pilidna a pagbatayan nga awanan sagiped ken addaan iti guyodan a kayo iti sangona. Ti dadduma addaan kadagiti saripda, ket naabbongan ti sumagmamano, a kas iti innem a kareson nga addaan iti abbong (tunggal maysa ket guyguyoden ti dua a toro) a naaramat a pangidaliasat kadagiti aruaten ti tabernakulo. (Nu 7:2-9) Dagiti “karuahe” iti Apocalipsis 18:13 mabalin a tumukoy kadagiti uppat-pilidda a kareson wenno kareton.

Idiay Israel, nangnangruna kadagidi nagkauna a tiempo, ti kareson gagangay a guyoden ti bakbaka imbes a kabkabalio, a dagiti kabalio nangnangruna a nausar kadagiti karuahe ken iti gubat. (2Sm 6:3, 6; 15:1; 1Cr 13:7, 9; Pr 21:31) Naaramat dagiti kareson a pangidaliasat iti tattao (Ge 45:19, 21, 27; 46:5), bukbukel, ken dadduma pay a karga. (1Sm 6:7-14; Am 2:13) Dagidiay nausar iti gubat (kas nadakamat iti Sal 46:9) ket mabalin a karkareson a pagawit iti gargaret ti militar. Idi tiempo ni Isaias, idi adu ti kabkabalio dagiti Israelita (Isa 2:7), dagiti kareson a guyguyoden dagiti kabalio ket naaramat iti panagirik.​—Isa 28:27, 28.

Kinuna ni mammadto Isaias nga asi pay dagiti tattao nga ‘agguyguyod iti basol a kasla babaen kadagiti guyodan ti kareson.’ Daytoy a sasao mabalin nga ipasimudaagna a ti kakasta a tattao naisinggalutda iti basol, no kasano a naigalut dagiti animal kadagiti guyodan ti kareson a guyodenda.​—Isa 5:18.