ZELOFEHAD

[kaipapananna, mabalin a, “Salinong (Pagsalinongan) iti Alinggaget”].

Kaputotan ni Manases babaen kada Maquir, Galaad, ken Hefer. (Nu 26:29-33) Natay ni Zelofehad kabayatan ti 40-tawen a panagallaalla iti let-ang, ngem saan a karaman ‘kadagidiay naguurnos a bumusor ken Jehova iti gimong ni Kore, no di ket isu natay gapu iti bukodna a basol.’ (Nu 27:3) Awan annakna a lallaki ngem adda lima nga annakna a babbai a napanawanna: da Mala, Noe, Hogla, Milca, ken Tirza, nga aminda ket nakalasat a simrek iti Naikari a Daga.​—Nu 27:1; 1Cr 7:15.

Daytoy naidumduma a kasasaad ket nangpataud kadagiti parikut maipapan iti panagtawid. Idi kiniddaw ti annak ni Zelofehad ti bingay ni amada a daga idiay Manases, indatag ni Moises ti kasoda iti sanguanan ni Jehova. Ti hudisial a pangngeddeng ti Dios ket masapul a mayawat ti tawid ti pamilia iti annak a babbai nga awanan kakabsat a lallaki. (Nu 27:1-9; Jos 17:3, 4) Idi agangay, naikalikagum kadagitoy nga annak a babbai a makiasawada iti lallaki a kameng ti tribu ni amada tapno ti tawid ket agtalinaed iti tribu.​—Nu 36:1-12.