ZEMAREO

Maysa a pamilia wenno tribu a nagtaud ken Canaan nga anak ni Ham. (Ge 10:15, 18; 1Cr 1:13, 16) Ti pannakadakamat dagitoy a Canaanita iti nagbaetan ti “Arvadeo” (nainaig iti Arvad iti asideg ti igid ti baybay ti Fenicia) ken “Hamateo” (nalabit nainaig iti Hamat idiay Siria) ipasimudaagna a nagyan dagiti Zemareo iti makin-amianan nga igid ti baybay ti Fenicia. Sigun iti maysa a panangatur, dakamaten ti Ezequiel 27:8 ti “nasigo [masirib] a lallaki ti Zemer” (RS; BE), a kunaen ti dadduma kas siudad dagiti Zemareo ken ipapanda nga isu ti Tell Kazel, agarup 35 km (22 mi) iti amianan a daya ti Tripoli. Nupay kasta, kastoy ti mabasa iti Hebreo a teksto: “Dagidiay nasigo a tattaom [lallakim], O Tiro.” (AT; RS, ftn) Sabali a disso ti ipatuldo ti dadduma ta inaigda dagiti Zemareo iti Sumra, maysa nga ili iti igid ti baybay iti nagbaetan ti Tripoli ken Arvad.