ZENAS

Maysa kadagiti kakadua ni Pablo. Maipapan kenkuana, kinuna ni Pablo ken Tito: “Siaannad nga abastuam ni Zenas . . . ken ni Apolos maipaay iti panagdaliasatda.” (Tit 3:13) Iti daydi a gundaway, nabatad nga adda ni Zenas iti isla ti Creta, ngem saan a naibaga no sadino ti papananda ken Apolos, no idiay Nicopolis, a ninamnama ni Pablo a pagkitaanda ken Tito (Tit 3:12), wenno iti sabali pay a lugar. Kuna ni Pablo a ni Zenas “nalaing iti [Mosaiko a] Linteg,” a mabalin a kayatna a sawen nga isu ket Judio wenno Judio a proselita a nagbalin a Kristiano. Ti Griego a naganna ket mangipasimudaag nga isu ket Judio a proselita, ngem saan a sigurado daytoy yantangay saan a karkarna kadagiti Judio idi umuna a siglo K.P. ti maaddaan iti Griego wenno Romano a nagan. Ti sabali pay a kasta a pagarigan ket da Justo, Dorcas, ken Marcos.​—Ara 1:23; 9:36; 12:25.