ZERED, NAAPRES A GINGET TI

Maysa a naapres a ginget a nagpakarsuan dagiti Israelita idi addada iti beddeng ti Moab. Napasamak daytoy idi agngudo ti 38 a kanayonan a tawen ti panagallaallada manipud iti tiempo ti panagrebelde idiay Cades-barnea. (Nu 21:12; De 2:13, 14) Kadawyan a maikunkuna nga isu ti Wadi el-Hasaʼ, ti kaabagatanan a waig nga agturong iti Natay a Baybay. Nasurok a 56 km (35 mi) ti kaatiddog daytoy a ginget ken adda iti nagbedngan ti Moab ken Edom. Sumalog iti agarup 1,190 m (3,900 pie) ken sumrek iti makin-abagatan a daya nga ungto ti Natay a Baybay. Ti kaakaba ti makinngato a paset ti ginget ket agarup 5-6 km (3-4 mi). Adda pammaneknek a masarakan idi sadiay ti agsasaruno a sarikedked dagiti Edomita a nagpaay a mangsaluad kadagiti nainkasigudan a sungadan manipud iti abagatan ti Wadi el-Hasaʼ.