SICLAG

Maysa a naipasngat a siudad a naituding kadagiti Simeonita iti makin-abagatan a Juda. (Jos 15:21, 31; 19:1, 2, 5; 1Cr 4:24-30) Idi agangay, ti Siclag ket sinakup dagiti Filisteo. Dayta ti inted ni Aquis, ari ti Gat, kas lugar a pagnaedan ti pugante a ni David (ket idi agangay nagbalin a kukua dayta ti ar-ari ti Juda). (1Sm 27:6) Daytoy a siudad ket rinubbuot ken pinuoran dagiti Amalekita, a nangkautiboda kadagiti tattao, pakairamanan da Ahinoam ken Abigail nga assawa ni David. Idi naparmeken ni David dagiti tulisan ken nabawina dagiti kautibo ken bambanag a naala, nangipatulod manipud Siclag iti sumagmamano a samsam ti gubat kadagiti gagayyemna, dagiti lallakay iti Juda iti nadumaduma a siudad. (1Sm 30) Adu nga armado a nabileg a lallaki ti kimmappon ken David idiay Siclag, ket sadiay a naipadamag kenkuana ti ipapatay ni Ari Saul. (2Sm 1:1, 2; 4:10; 1Cr 12:1, 2, 20-22) Kalpasan ti pannakaidestieroda idiay Babilonia, nagyan iti daytoy a siudad ti sumagmamano iti annak ni Juda. (Ne 11:25, 28) Adda nadumaduma a lugar a maibagbaga nga ayan ti Siclag, ngem sigun ken Y. Aharoni ken ti dadduma pay isu dayta ti Tell esh-Shariʽah (Tel Seraʽ), agarup 7 km (4 mi) iti daya ti Gerar ken 22 km (14 mi) iti amianan a laud ti Beer-seba.