ZIN

1. Let-ang a nagdaliasatan dagiti Israelita iti panagturongda iti Canaan; saan nga isu ti Let-ang ti Sin. (Nu 33:11, 36) Iti maikadua a tawen kalpasan ti ipapanaw ti Israel iti Egipto, 12 nga Israelita ti nangsimisim iti Naikari a Daga, a nangrugida iti Let-ang ti Zin. Iti daydi a tiempo nagpakarso dagiti Israelita idiay Cades. (Nu 13:21, 26) Idi agangay, kalpasan ti adu a tawen a panagallaallada idiay let-ang, nakagteng dagiti Israelita idiay Cades iti Let-ang ti Zin iti maikadua a gundaway. Daytoy a lugar ti Let-ang ti Zin ket langalang, di mamulmulaan, awanan kadagiti higos, ubas, granada, ken danum. (Nu 20:1-5; idiligyo ti Nu 20:28; 33:38; De 1:3.) Gapu iti dandanum ti Meriba idiay Cades iti Let-ang ti Zin, saan a nasantipikar da Moises ken Aaron ni Jehova iti sanguanan dagiti umili ket napukawda ti pribilehio a sumrek iti Naikari a Daga.​—Nu 27:12-14; De 32:50, 51.

Ti Let-ang ti Zin ket adda iti “abay ti Edom” (yantangay adda iti laud ti Edom) ken iti makin-abagatan a daya nga ungto ti teritoria a naituding iti Juda. (Nu 34:3; Jos 15:1) Yantangay adda ti Cades kadagiti let-ang nga ayan ti Zin ken ti Paran (Nu 13:26; 20:1), mabalin a nagsilpo dagitoy a rehion ti let-ang, wenno ti Zin mabalin a maysa idi a paset ti nalawlawa a Let-ang ti Paran.

2. Namindua a nagparang ti “Zin” a saan a naaramat ti termino a “let-ang.” Kadagitoy a kaso, mabalin a tumukoy daytoy iti agdama a di masinunuo nga ili iti abagatan ti Juda iti nagbaetan ti sasang-atan ti Acrabbim ken Cades-barnea. Dayta met ti nakaalaan ti nagan ti let-ang nga adda iti aglikmutna. Wenno mabalin a tumukoy a mismo iti Let-ang ti Zin.​—Nu 34:4; Jos 15:3.