ZOBA

Maysa a pagarian dagiti Sirio (Aramaeano) a pagaammo met kas Aram-Zoba. (Sal 60:Sup) Maysa ni Hadadezer kadagiti nagbalin nga arina. (1Ar 11:23) Ti nagtipon a porma a “Hamat-zoba” ket mabalin a tumukoy kadagiti agkaabay a pagarian a napanaganan iti Hamat ken Zoba. (2Cr 8:3) Agparang a ti Zoba ket masarakan iti amianan ti Damasco a ti sakupna dumanon iti rehion ti Hamat iti amianan ken agingga iti karayan Eufrates iti daya.​—2Sm 8:3.

Nakigubat ni Ari Saul iti ar-ari ti Zoba. (1Sm 14:47) Idi agangay, dagiti Ammonita nangtangdanda kadagiti Sirio ti Zoba ken kadagiti dadduma pay a tropa tapno makirupakda ken David, ngem inabak amin ida ti buyot ni David. (2Sm 10:6-19; 1Cr 19:6-19) Nalabit nga iti daytoy a gubat, ni David pinarmekna ni Hadadezer nga ari ti Zoba ken nangala iti samsam agraman nakaad-adu a gambang (idi agangay naaramat iti pannakaibangon ti templo) manipud kadagiti siudadna a Beta (nalawag a napanaganan met iti Tibat) ken Berotai (Cun?). (2Sm 8:3-12; 1Cr 18:3-9) Ti maysa kadagiti nabileg a lallaki kadagiti puersa militar ni David ket ni Igal nga anak ni Natan a taga Zoba.​—2Sm 23:8, 36; kitaenyo ti ARAM Num. 5; HADADEZER.