DI MAYALUBOG

Saan a maitunos iti linteg. Iti Levitico 10:1 ti Hebreo a sao a zar (pangbabai a porma, za·rahʹ; iti literal, karkarna) naaramat mainaig iti ‘di mayalubog nga apuy, a saan nga imbilin kadakuada ti Dios’ ngem indatag ti annak ni Aaron a da Nadab ken Abihu iti sanguanan ni Jehova ken gapu iti dayta pinapatayna ida babaen ti apuy. (Le 10:2; Nu 3:4; 26:61) Kalpasan dayta, ni Jehova kinunana ken Aaron: “Dikay uminum iti arak wenno makabartek nga inumen, sika ken ti annakmo a naikuyog kenka, no sumrekkayo iti tolda ti gimong, tapno saankayo a matay. Paglintegan dayta agingga iti tiempo a di nakedngan maipaay kadagiti kaputotanyo, agpadpada a tapno mangaramid ti pagdumaan iti nagbaetan ti nasantuan a banag ken ti natabbaaw ken iti nagbaetan ti narugit a banag ken ti nadalus, ken tapno isuro iti annak ti Israel dagiti amin nga alagaden a sinao kadakuada ni Jehova babaen ken Moises.” (Le 10:8-11) Agparang nga ipatuldo daytoy a sibabartek idi da Nadab ken Abihu, a dayta a kasasaad ti nangpatured kadakuada a mangidaton iti apuy a saan a naibilin. Ti kasta nga apuy mabalbalin a maikaniwas no maipapan iti tiempo ken pamay-an a pannakaidaton dayta wenno iti lugar a nakaidatonanna, wenno mabalin nga insienso idi dayta a ti sangkapna naiduma iti nadeskribir iti Exodo 30:34, 35. Ti sibabartek a kasasaadda saan a maipagpambar iti basolda.

Ti isu met laeng a sao, zar, naaramat iti Exodo 30:9, mainaig iti panangpuor iti di mayalubog nga insienso iti rabaw ti altar ti insienso iti Nasantuan a Disso.​—Kitaenyo ti Rbi8 ftn.