Pattapatta ni Einstein iti Pannakaammo ti Tao

“Ti kadadakkelan a naaramidan ti siensia,” kuna ti mabigbigbig a mannurat iti siensia a ni Lewis Thomas iti maysa a salaysay a nagparang iti The New York Times, “isu ti pannakaammo a nakaro ti kinaignorantetayo.” Nakalablabes kadi daytoy a panagsao? Maisupadi ketdi, iti surat iti Times, ni Ely E. Pilchik nagsurat: “Palubosandak a mangpaneknek [kadagiti sasao ni Thomas] manipud iti nainkalintegan a mapagtalkan a gubuayan.” Inlawlawagna nga idi Mayo 20, 1954, inimtuodna daytoy a saludsod ken Propesor Albert Einstein:

“Naipadamag kaniak nga iti napalabas a bulan wenno nabaybayag pay nakisaritaka iti maysa a bisita ket napagsaritaanyo ti pannakaammo kadagiti linlinteg ti uniberso. Impamatmatmo a nupay adda dagiti nabiit pay a rinang-ayan bassit pay laeng ti pannakaammotayo. Inyilustraryo daytoy kadagiti dua a pangarigan: Umuna, ti rinang-ayan ti pannakaammotayo maipadis iti magun-odan ti maysa a tao, nga interesado a makaadal maipapan iti bulan, no umuli iti atep ti balayna tapno makitana a naimbag dayta a silaw.

“Sigun iti report, ti maikadua nga ilustrasionyo isu ti bassit a pannakaammotayo iti uniberso a naisentro iti kanito a pannakaturposyo iti kaaduan a teoria ti kinarelatibo. [Iti] dayta a kanito nagdisso ti gagangay a ngilaw iti papelyo. Imparangarangyo a ditoy naipasdekyon dagiti amin a kangrunaan a pisikal a linlinteg ti uniberso, a kasla kunkunaenyo, adtoy ti tulbek kadagiti amin a sekreto ti uniberso, ngem pudno a bassit ti ammoyo maipapan iti kasasaad dayta a ngilaw.

“Kasta dagiti naidanon a sasao kaniak. Kayatko koma, no ipalubosyo, nga usaren ida no umisoda. No saan, apresiarek unay ti panangkorehiryo kaniak.”

Nakaawat ti nagimtuod iti sungbat a napetsaan iti Mayo 21, 1954, a nagkuna: “Ti pannakaisalaysay ti pannakisaritak iti nangipadamag kenka ket umiso unay ket mabalin nga usaren daytoy a porma. Buyogen iti naasi a kablaaw, Sipapasnek, (nagpirma) A. Einstein.”​—New York Times, Setiembre 1, 1981.

Nupay no itultuloy a parang-ayen ti tao ti pannakaammona iti uniberso, kaskasdi a nagbassitan pay laeng, isu a mangipalagip kadagiti sasao ni Job maipapan iti Dios ken ti panamarsuana: “Adtoy! Dagitoy isuda laeng dagiti paspaset a naruar dagiti daldalanna ket anian a nagbassit ti maysa a dayamudom a mangngegtayo kenkuana! Ngem ti gurruod ti pannakabalinna asino ti makaawat?”​—Job 26:14.