Ti Biag ken Ministerio ni Jesus
Adu Pay a Datdatlag Idiay Capernaum
ITI Panaginana kalpasan ti panangawis ni Jesus kadagiti umuna nga uppat nga adalanna—ni Pedro, Andres, Santiago, ken Juan—napanda amin iti maysa a lokal a sinagoga idiay Capernaum. Sadiay rinugian ni Jesus ti nangisursuro, ket nagsiddaaw dagiti tattao agsipud ta sinursuruanna ida kas maysa nga addaan kinaturay ket saan a kas kadagiti eskriba.
Iti daytoy a Panaginana adda ti maysa a lalaki nga adda sairona. Kalpasan iti apagkanito, isut’ nangipukpukkaw iti natbag a timek: “Ania ti bibiangmi kenka, Jesus a Nazareno? Immayka kadi a mangpukaw kadakami? Ammok no siasinoka, sika ti Santo ti Dios.”
Ti sairo a mangiturturong ti lalaki ket kinapudnona maysa kadagiti anghel ni Satanas. Tinubngarna ti demonio, kuna ni Jesus: “Agulimekka, ket rummuarka kenkuana!”
Ket, ti demonio ti namagpigerger iti tao ket nagikkis iti dakkel a timek. Ngem dayta ti rimmuar iti tao a dina met sinaksaktan. Ket nagsiddaawda amin iti kasta unay! “Ania daytoy?” insaludsodda. “Situturay nga agbilin uray pay kadagiti espiritu a narugit, ket agtulnogda kenkuana.” Ti damag maipapan iti daytoy ti nagsaknap kadagiti kabangibangna a luglugar.
Idi a pinanawanda ti sinagoga, napan ni Jesus ken dagiti adalanna idiay balay ni Simon, wenno ni Pedro. Sadiay ti katugangan a babai ni Pedro ti aggurigor unay. ‘Pangngaasim ta isu ti tulongam,’ impakpakaasida. Gapuna immasideg ni Jesus, innalana ti imana, ket isu ti imbangonna. Apaman latta ta isu ti immimbag ket nangrugin a nangisagana iti taraonda!
Kalpasanna, idi limneken ti init, inyeg dagiti adu a tattao manipud nadumaduma a luglugar idiay balay ni Pedro dagiti masaksakitda. Di nagbayag ti intero a siudad naur-urnongdan idiay ruangan! Ket pinaimbag ni Jesus amin dagiti masaksakit, uray pay no ania ti saksakitda idi. Pinaimbagna pay dagiti naluganan ti sairo. Apaman a maparuarda, agpukkaw dagiti sairo a naparuar: “Sika ti Anak ti Dios.” Ngem tinubngar ni Jesus ida ket saanna ida a pinalubosan nga agsao agsipud ta ammoda nga isu ti Kristo. Marcos 1:21-34; Lucas 4:31-41; Mateo 8:14-17.
◆ Aniat’ napasamak idiay Sinagoga iti Panaginana kalpasan nga inawis ni Jesus dagiti uppat nga adalanna?
◆ Sadinot’ napanan ni Jesus idi a rimmuarda iti sinagoga, ket ania a milagro ti inaramidna sadiay?
◆ Aniat’ napasamak iti kamaudiananna iti dayta met la a rabii?
[Ladawan iti panid 9]