Ipapaay ni Jehova dagiti Kasapulan Idiay Trinidad

MANIPUD iti bassit a nangrugianna idi 1912, ti trabaho a panangikaskasaba iti Pagarian idiay Trinidad ken iti kabangibangna a puro ti Tobago ti naglasaten iti sumagmamano a tukad iti panagsaknapna. Dagiti kaudian a pasamak​—idi Marso 1985​—isu ti pannakairingpas wenno pannakaidedikar iti baro a pasdek ti sanga idiay laeng ruar ti kabisera, a Port of Spain. Ti baro a pasdek ti kasapulan la un-unay, ta ti Trinidad ti naglak-am ti panagrang-ay a 79 porsiento kadagiti managibunannag ti Pagarian nanipud iti maudi a pannakaibangon ti pasdek ti sanga.

Ti panangsapul iti kalalainganna a daga iti bassit, ngem napuskol ti umilina nga isla ket saan a nalaka. Nangina dagiti dagdaga, ken ti ngina ti panagbangon ti nakangatngato unay. Kaskasdi, impaay ni Jehova amin dagitoy a kasapulan. Maysa a nagpintas, nalaka a danonen a disso ti nasarakan, di unay adayo manipud ti haywey iti eropuerto. Nagtitinnulongan dagiti kakabsat dayta a proyekto, a nangted iti nakaskasdaaw a panangsuportarda. Ngangngani tunggal agibumbunannag ti Pagarian idiay Trinidad ti addaan paset iti panagibangon.

Tunggal ngudo ti lawas maysa a grupo manipud maysa a kongregasion ti umay tumulong iti trabaho, bayat a dagidiay manipud iti sabali ti mangted iti taraon ken pagpalammiis. Ti panagtrabaho iti rabii ti maar-aramid iti mamindua wenno mamitlo a daras iti kada lawas. Nagtultuloy ti panagbangon agingga kadagiti panawen ti panagtutudona. Ket idi panawenen a maikabil ti semento iti umuna a grado, nasurok a 350 a kakabsat ti adda sadiay, a nagpipinnasaanda dagiti tinimba a semento babaen ti ima. Dagiti kaarruba a Hindu napalalo ti panagsiddaawda! Daytoy ti nangted gundaway a mangaskasaba kadakuada.

Ti ngina ti panagbangon naibaklay iti kasta met laeng a naimpusuan nga espiritu. Uray dagiti kakabsat a babbai intulongda dagiti al-alahasda a balitok a dayta ti mailako ken maipaay iti panagbangon. Maysa nga ubing a lalaki nga agtawen iti walo ti nagsurat: “Pagay-ayatko ti agtrabaho iti sanga, ngem gapu ta nasakit ti bukot ni Tatangko ket saan a makapagtrabaho iti nadagsen, saanak met a makaumay a masansan. Gapuna ipatulodko daytoy a kuarta a naurnongko a makatulong iti trabaho.”

Kabayatan iti panagbangon, nakalawlawag ti tulong ni Jehova. Ni Hilary Charles, ti manangaywan iti panagbangon, malaglagipna pay ti tiempo a nadandanonda ti sangapulo a sako laengen a semento ti natda ket immawagda iti pabrika ti semento tapno makaalada ti ad-adu pay. Kunana: “Talaga a nagrigat ti panangala iti semento. Kunada a dikami makaala iti semento aginggat’ sumaganad a lawas. Dayta ket agarup alas nuebe iti bigat. Iti alas dos iti dayta a malem, adda nakitak a sangakargaan ti semento nga immay. Ti tsuper ti trak ti nagkuna: ‘Daytoy a sangakarga a semento ti maipaay iti sabali a lugar, ket naibaga kaniak nga iyegko dayta ditoy.’ Saanna a maawatan dayta. Daytat’ tulong ni Jehova.”

Ti dua-grado a pasdek ti sanga ket kasla porma ti maysa a T, a ti pagserkan ket adda idiay ngato​—idiay umabagatan a deppaarna. Iti makingkanawan iti nakapimpintas a lobby isu ti Kingdom Hall, a mabalin a pagtugawan ti nasurok a 200 a tattao. Maysa a nalawa nga opisina ti adda iti kanigid. Ti sirok ti at-atiddog a paset isu ti ayan dagiti pagimalditan, pagipatulodan kadagiti literatura ken ti paglabaan. Idiay ngato isu ti kusina, kumidor, ken dagiti kukuarto​—walo a kukuarto, a tunggal maysa addaan iti bukodna a pagdigusan. Maysa a bassit a libraria ken sala ti adda iti ngatuen ti opisina.

Iti Sabado, Marso 16, isu ti aldaw ti dedikasion. Ni Milton G. Henschel iti Bagi a Manarawidwid dagiti Saksi ni Jehova ti nangted iti palawag. “Saan laeng nga ammo ni Jehova ti mangipaay, no di ket ammona pay met no ania ti kasapulantayo,” kuna ni Kabsat Henschel. Wen, ti baro a pasilidad ket maysa a sagut manipud ken Jehova. Nagpatingga ti sesion babaen iti maysa a napasnek a kararag iti panangidedikar ken ni Jehova. Anian ti ragsakmi!

Dagiti Saksi ni Jehova idiay Trinidad ken Tobago pagrag-oanda ti irarang-ay nga impaay ni Jehova. Ket itultuloyda ti umaddang, a kumitkita iti ad-adu pay nga irarang-ay bayat nga itultuloyna nga ipaay ti kasapulanda kas dagiti manangibunannag ti Pagarian.