Dagiti Saludsod Manipud Kadagiti Managbasa
◼ Iti pangngarig ni Jesus maipapan iti tao a baknang a saan a nabaknang iti Dios, asino daydiay “da” a nangdawat iti kararua ti tao?
Saan a tuktukoyen ni Jesus ti aniaman a grupo dagiti tattao wenno dagiti anghel. Idiay Lucas 12:20 inusarna ti saan a piho a “da” kas maysa laeng a pamay-an a panangiyebkas no aniat’ mapasamak iti tao.
Daytoy a pangngarig ti masarakan idiay Lucas 12:16-21. Daydiay tao a baknang ket saan a mapmapnek iti adda a nawadwaden a material a bambanagna. Intultuloyna nga impamaysa ti negosiona tapno maparang-ayna pay ti kinabaknangna. Nagpatingga a kinuna ni Jesus: “Ngem kinuna kenkuana [ti tao a baknang] ti Dios, ‘Nakuneng, ita a rabii masublian a dawatenda kenka ti kararuam. Ket dagiti adda nga insaganam, asinonto ti agtagikua kadakuada?’ Kastoy ti agurnong ti gamgameng a maisagana kenkuana ngem saan a nabaknang iti Dios.”
Dadduma a managipatarus us-usarenda ti passive a panangipatarus kas ti: “Ita a rabii masublian a dawaten kenka ti kararuam.” (New American Standard Bible) “Ita a rabii madawat kenka ti kararuam.” (The Jerusalem Bible) “Iti daytoy a rabii ti biagmo ti madawat.” (The Twentieth Century New Testament) “Daytoy a rabii ti kararuam ti maawaganto.” (Byington) Nupay kasta, ti Hebreo (nga isut’ panagsao ni Jesus ken ti Griego (nga isut’ panagsurat ni Lucas) inaramatda ti saan a piho a maikatlo a persona. Ti teksto ti Griego idiay Lucas 12:20 ti literal a kunana “iti daytoy a rabii ti kararuam dawatendanto manipud kenka.” Ti verbo iti maikatlo a persona ti plural. Gapuna, imbes a sukatanda laeng dayta iti passive form (kas kadagiti pangarigan nga adda iti ngato), ti New World Translation ken dagiti dadduma a patarus inusarda ti panangipaulog kas “dawatenda.”
Ngem, agpaay a pagimbagantayo, no ditay palpalubosan dagiti teknikalidad ti gramatika a mangpalibeg iti nalawag a pammagbaga ni Jesus maipapan iti materialismo. Saanna nga impiho no kasano ti ipapatay ti tao a baknang. Ti punto a ta babaen iti maysa a pamay-an mapukaw daydiay a tao ti kararuana, wenno biagna, iti dayta a rabii. Ngem kasanot’ takderna iti Dios? Ti uray asinoman kadatayo ti mabalin a maigamer unay iti panangparang-ay iti material a kasasaadna ket umas-asping a maikapis iti panagbalinna a nabaknang iti Dios. Ti lubong ti negosio itatta ti mangidagdagadag iti espiritu ti ‘ad-adu pay.’ Uray pay dagiti tattao a dagiti kompaniadan ti addaan nawadwaden a ganansia manipud kadagiti lakoda kadagiti minilmilion a doliar, libras, marks, ken dadduma pay ti mabalin a masulisogda nga agsapul iti ad-adu pay—ad-adu pay nga empleado, ad-adu pay a lako, ad-adu pay a ganansia, ad-adu pay a kinaluho, ad-adu pay idiay banko. Ti saludsod ni Jesus ti apagpag-isu itatta kas idi damo nga insaludsodna: “Dagiti adda nga insaganam, asinonto ti agtagikua kadakuada?”—Lucas 12:20.