“Gamgameng Gapu iti Naulbod a Dila . . . Maysa nga Alingasaw”

KADAGITOY nga al-aldaw masansan a mamatmatmatan ti panagulbod ken panagkusit kas lehitimo​—ken nakabalballigi​—dagiti taktika iti negosio. Pudno met daytoy idi panawen ti Biblia. Nagsurat ni salmista nga Asap kadagidiay “dumegdeg ti kinabaknangda,” kaawatan babaen kadagiti sinisuitik a gakgakat. Dagita ti mabalin nga agparang a “sinanam-ayda” gapu kadagiti kinabaknang nga impaay ti kinasikapda kadakuada.​—Salmo 73:8, 12.

Nupay kasta, dagiti Kristiano itatta, masapul a liklikanda ti ‘panagayat kadagiti sinisuitik a gunggona’ ket agtungpalda kadagiti sinisuitik nga ar-aramid iti negosio. (1 Pedro 5:2) Namakdaar ti Proverbio 21:6: “Ti pananggun-od kadagiti gamgameng gapu iti naulbod a dila isu ti alingasaw a pagal-alikubengen dagiti agbiruk iti patay.” Wen, aniaman a “gameng” a nagun-odan babaen iti panagsuitik ken panagulbod arigda laeng iti kabiit iti “alingasaw.” Iti di agbayag “dagiti gamgameng ti kinadakes awan mamaayda.” (Proverbio 10:2) Pudno unay, ti managulbod ket “agbiruk iti patay” babaen iti panangsursurotna iti makapapatay a kurso. Mabalin a ti biagna ti maguped a nasapsapa babaen iti panagbalandra dagiti naulbod a gakgakatna. (Idiligyo iti Ester 7:10.) Wenno iti kamaudiananna, ti biagna ti mapagpatingganto inton aldaw a panangdusa ti Dios.