‘Naidedikar iti Naindaklan a Dios a ni Jehova iti Agnanayon’
IDI Abril 1935, maysa a nalatak nga Americano a ministro ken pumapalawag ti bimmisita iti Hawaii. Daytoy ket naisangsangayan a paginteresan dagiti Saksi ni Jehova, nga addaan laeng iti bilang a 12 iti dayta a tiempo, ta daytoy a nalatak a bisita isu ni Joseph F. Rutherford, ti maikadua a presidente iti Watch Tower Bible and Tract Society. Ti palawag nga “Asino ti Mangiturayto iti Lubong?” insalaysayna ti umay a sangalubongan a panangituray iti Pagarian ti Dios. Daytat’ naipalawag idiay lokal nga auditorium iti high school ket nakagun-od iti adu a panangipablaak.
Ti nagan ti Dios ken ti Pagarianna isu ti nabayagen a tema ti panangaskasaba dagiti Saksi ni Jehova nanipud pay iti moderno-aldaw nga itataudda. Gapuna daytat’ paginteresan dagiti amin a mangapresiar ken mangusar ti personal a nagan iti mannakabalin-amin a Dios, ni Jehova, a ti katupag ti sao a Hawaiian, nga Iehova, ti gagangay nga us-usaren dagiti immuna a managdaydayaw a taga Hawaii. Maysa kadagiti immuna a simbaan nga imbangon dagiti ministro iti Kakristianuan idiay Hawaii, ti simbaan a bato idiay Kawaiahao idiay Honolulu, ket naisaad ti pamuonna idi 1839. Naikitikit iti daytoy a dedikasion a bato isu dagiti sasao a: “Ken Iehova a Diostayo iti agnanayon.”
Nanipud idi 1935, idi bimmisita ni Judge Rutherford, ti trabaho dagiti Saksi ni Jehova idiay Hawaii rimmang-ayen manipud 12 nga aktibo a Saksi agingga iti nasurok a 5,400 itatta. Pudno a dagitoy ‘naidedikarda iti naindaklan a Dios a ni Jehova iti agnanayon.’