Report dagiti Manangiwaragawag ti Pagarian
Dagiti Kapadasan Manipud Tuvalu
TI NAIMBAG a damag ti Pagarian ti maiwarwaragawag kadagiti napipintas nga isla ti Tuvalu, idiay Sud Pacifico, ket maipapaay ti nasayaat a pammaneknek uray kadagiti tattao iti nangangato a puesto. Maysa a kabsat nga Australiano a kadua ti asawana nga agserserbi iti trabaho a panagdaliasat idiay Tuvalu ti mangisalaysay ti kapadasanna kadatayo:
“Siak ken ni baketko ti naawis a tumabuno iti pannangan idiay balay ti Primer Ministro ti Tuvalu. Ti okasion ket isut’ ibibisita ti Minister of Foreign Affairs ti Australia. Bayat ti pannangan, siak ken ni baketko ti naaddaan nagsayaat a gundaway a mangasaba agpadpada iti Australiano a ministro ken ti asawana. Idi inyam-ammonakami, kinuna ti Primer Ministro nga anian a nagsayaat a trabaho ti ar-aramiden dagiti Saksi ni Jehova idiay Tuvalu, nangnangruna maipapan ti panangipatpatarus kadagiti pagbasaantayo iti pagsasao a Tuvaluan. ‘Addaanak ti kopia amin dagiti publikasionda iti libreriak, ket nagsasayaatda!’ kunana. Agpadpada ti ministro ken ti asawana ti interesadoda a makangngeg maipapan iti irarang-ay ti trabahomi idiay Tuvalu.
“Iti karabiianna, napankami iti sumagmamano a lokal a pabuya ti tradisional a salsalada. Kalpasanna ti Gobernador Heneral ti Tuvalu ti immasideg kadakami ket kunana nga addada Saksi a simmarungkar ti pagtaenganna iti lawas sakbayna ket nangibatida ti sumagmamano a kopia ti magasin a Pagwanawanan ken Agriingkayo! Nadlawna nga idiay likudan ti maysa kadagiti magasin adda pablaak maipapan iti New World Translation of the Holy Scriptures ket kayatna a maammuan no kasanot’ pannakaala ti maysa idiay. Kinunami a maragsakankami a mangipaay ti maysa a kopia kenkuana. Iti sumaganad a Domingo, napanak idiay balayda nga awitko ti Biblia, ket naaddaankami ti nagsayaat a panagpatpatang iti agarup maysa oras. Imbagana kaniak nga apresiarenna unay ti trabahotayo ken dagiti pagbasaantayo. Kinapudnona, idi dimtengkami idiay balayda, ti asawana ti mangbasbasa iti libro nga Agbiag nga Agnanayon iti Tuvaluan. Gapuna maragsakankami a makaited ti pammaneknek iti Tuvaluan. Gapuna maragsakankami a makaited ti pammaneknek iti sumagmamano ‘nga adda iti nangangato a puesto.’”—1 Timoteo 2:1-4.
Iti sabali nga okasion simmarungkar ti Primer Ministro ti Tuvalu idiay Solomon Islands. Ti komunidad dagiti Tuvaluans nga agindeg sadiay ti nangaramid ti piesta para kenkuana. Ket nairaman kadagidiay naimbitaran iti padaya isut’ maysa a kabsat a babai, a nangited met iti sumaganad a kapadasan:
“Iti panagpatingga ti daya, nangted gundaway ti Primer Ministro iti panagsaludsod maipapan kadagiti maudi a paspasamak idiay Tuvalu. Maysa kadagiti saludsod ti nangimtuod, ‘Adda aya aniaman a baro a relihion idiay Tuvalu?’ Simmungbat ti Primer Ministro a nagkuna nga ‘addada sumagmamano a baro a relihion a napalubosan a sumrek idiay Tuvalu ngem adda laeng maymaysa a nasayaat.’ Idi sinaludsodda no ania dayta, kinunana, ‘dagiti Saksi ni Jehova.’
“Tunggal maysa ti nagsiddaaw iti sungbatna, ket ti kaawatan a sumaruno a saludsod ti rimsua a mangammo no apay a dagiti Saksi ni Jehova ti ‘maymaysa a nasayaat a relihion.’ Insungbatna: ‘Agsipud ta dagiti pastortayo ti agmalmalem nga agtugtugawda kadagiti balbalayda ken agkampanada laeng no Domingo a mangayab kadatayo a mapan ken dumngeg kadakuada. Ngem dagiti Saksi ni Jehova ti aktual nga umay kadakayo, ket uray no saankayo a mapan idiay simbaan, isuroda kadakayo ti Biblia iti mismo a pagtaenganyo.’”
Gapuna, nupay dadduma babbabalawenda ti ministeriotayo a panagbalaybalay, kaawatan a dadduma apresiarenda ti panangipipantayo ti mensahe kadagiti mismo a pagtaenganda.—Aramid 5:42.