Baro a Pagtaengan Para iti Eskuelaan Dagiti Misionero iti Gilead
IDI Pebrero 1, 1943, ni Nathan H. Knorr, dati a presidente iti Watchtower Bible and Tract Society, impalawagna ti panglukat a palawag iti umuna a klase iti baro nga eskuelaan. Inlawlawagna kadagiti sangagasut nga estudiante a “saan a panggep daytoy nga [eskuelaan] a kabalandakayo nga agbalin nga ordinado a ministro. Dakayo ministroskayon ket aktibokayon iti ministerio iti adun a tawtawen. . . . Ti kurso nga adalen . . . isu ti naipamaysa a panggep a mangisagana kadakayo nga ad-adda a makabael a ministros.” Agingga itoy nga aldaw itultuloy ti Watchtower School of Gilead ti mangsanay kadagiti ministros a maipaay iti kinamisionero kadagiti sabali a dagdaga.
Idi 1943, ti Gilead School ket adda idiay Finger Lakes iti rehion ti New York State. Nagtalinaed sadiay ti Gilead iti 17 a tawtawen. Kalpasanna, idi 1961, daytat’ naiyakar idiay Brooklyn. Gapu iti ania a panggep? Ti kurikulum ti Gilead kankanayon a naaramid a mangsabet iti pakasapulan ti organisasion. Ti pannakasapul iti panangparang-ay ken nasaysayaat a panangorganisar kadagiti pasilidades iti intero a daga kasapulanna ti nasaksaknap a panangisuro dagiti kamkameng iti hedkuarters dagiti Saksi ni Jehova, a masarakan idiay Brooklyn, kadagiti estudiante. Gapuna iti adun a tawtawen, naipaganetget ti panangsanay kadagiti kamkameng iti sanga. Kalpasanna, naipamaysa manen iti kinamisionero.
Kadagiti sumaganad a 27 a tawtawen, 1961 agingga iti 1988, dagiti estudiante iti Gilead School tinagiragsakda ti nakipagnaed ken nagsuro a kadua a mismo dagiti kamkameng ti hedkuarters idiay Brooklyn. Sadiay nagunggonaan dagiti estudiante iti nasinged a pannakilangen kadagiti miembro ti Manarawidwid a Bagi dagiti Saksi ni Jehova ken kadagiti dadduma a nasanayen a ministros. Ania pay ti nasaysayaat a pamay-an ti panangsuro no kasano ti panagandar ti maysa a sanga ti Watch Tower Society? Nagunggonaan dagiti estudiante saan laeng a manipud iti pannakasanay iti klase no di ket manipud iti panagpaliiw kadagiti kamkameng iti hedkuarters nga agtrabaho iti inaldaw-aldaw.
Ania ti epekto ti Gilead School iti internasional a trabaho a panangasaba? Kadagiti 93 a coordinator ti branch committee a mangsalsalimetmet nga organisado ti trabaho iti sangalubongan, 74 ti graduado iti Gilead School. Daytoy ti mangiparangarang iti nagsayaatan a pannakasanay nga inawat dagitoy a lallaki iti panangtaming kadagiti nadagsen a rebbengen a panangipastor iti ili ti Dios itatta. Adu nga agdaldaliasat a manangaywan a mangipapaayen kadagiti kasapulan iti organisasion ti graduado met iti Gilead School. Wen, ti programa ti panagsanay idiay Gilead School nakiaddang kadagiti kasapulan iti organisasion.
Umakar ti Gilead Manipud Brooklyn
Nupay kasta, maminsan pay, naikeddengen a maiyakar ti Gilead School. Gapuna idi otonio iti 1988, uppat a trak dagiti muebles ken alikamen ti opisina ti simmangpet iti maikatlo a pagtaengan ti Gilead—ti Watchtower Farms, nga adda idiay Wallkill, Nueva York. Iti uneg laeng ti dua a bulan, dagiti kamkameng a mangimatmaton iti Watchtower Farms nangisaganada kadagiti nagsayaatan a kuarto a pagadalan, maysa a libraria, ken dagiti opisina a maipaay iti eskuelaan. Dadduma ti nagtrabaho iti aldaw ken rabii a mangisagana kadagiti pasilidades iti eskuelaan tapno umabut iti umiso a tiempo iti panangrugi ti sumaganad a klase iti panagsanayda.
Idi Oktubre 17, 1988, nangrugin ti maika-86 a klase ti Gilead. Pulos a di simarsardeng, intuloy ti eskuelaan ti panggepna a ‘mangsanay kadagiti lallaki ken babbai nga agbalin nga ad-adda a makabael a ministros.’ Iti nagpintas a baro nga aglawlawna idiay Watchtower Farms, dadduma kadagiti kasasaad ti rehion iti dati nga eskuelaan idiay Finger Lakes ti naisubli.
Dagiti Graduado iti Maika-86 a Klase
Idi Marso 5, 1989, ti intero a kamkameng ti hedkuarters idiay Brooklyn ken Watchtower Farms nagtitiponda idiay Jersey City Assembly Hall tapno makiraman iti graduasion iti maika-86 a klase. Ni Daniel Sydlik, miembro iti Manarawidwid a Bagi, linukatanna ti programa babaen iti kararag. Ni Karl Klein iti Manarawidwid a Bagi nagserbi a kas tsirman. Iti introduksionna, pinagdumana dagiti ganggannaet a misionero iti Kakristianuan ken dagiti misionero dagiti Saksi ni Jehova. Anian ti kinaballigi dagiti nasanay iti Gilead a misioneros iti panangisuro iti kinapudno iti Sao ti Dios kadagiti pagilian a kas iti Japan, a sadiay addan nasurok a 131,000 a Saksi nga aktibo a makiramraman iti tay-ak ti ministerio!
Babaen iti tema a “Mabigbigkay Koma Babaen kadagiti Nasayaat nga Ar-aramid,” dineskribir ni Donald Krebs ti mamagbalbaliw a paset dagiti misioneros iti Gilead iti sangalubongan nga irarang-ay ti organisasion ni Jehova. “Dagiti nasayaat nga ar-aramidyo iti tay-ak ti panagmisionero kas mannursuro iti Sao ti Dios isunto . . . ti kababalin a pakailasinanyo. Paregtaendakayo nga aggaget. Sibabaknangto a bendisionan ni Jehova ti panangikagumaanyo.”
Ni George Gangas, miembro iti Manarawidwid a Bagi, nangted iti makatignay a palawag maipapan iti tema a “Ti Biblia ti Kasayaatan a Libro iti Baba ti Init.” Binalakadanna dagiti graduado: “Dikay liplipatan nga adalen ti Biblia. Napno ti Biblia kadagiti naespirituan a napapateg a bato . . . nga agsilnag ken rumimat. Ti mangapresiar kadakuada tarigagayanna ti mangmatmat kadakuada a maulit-ulit ket tagiragsakenna ti panagrimatda.”
Ti tema ni Richard Eldred ket “Makaaramidkayo iti Pagdumaan.” Bayat ti panangimpluensia dagiti baro a misioneros iti biag dagiti dadduma a tattao, makaaramidda kadagiti positibo a pagdumaan. Dagiti lallaki ken babbai idi ugma a kas da David, Nehemias, Deborah, ken ni Abigail adda positibo nga impluensiada kadagiti dadduma babaen ti napasnek a panangaywan kadakuada, panangsalimetmet iti natured a pammati, ken panangiparangarang iti naemma, naespirituan a kababalin.
“Bilangenyo dagiti Bendisionyo” isu dagiti sasao ni Lyman Swingle, miembro iti Manarawidwid a Bagi, iti agraduar a klase. Kalpasan ti pananglagipna kadagiti sumagmamano a bendision a nagun-odan ti klase, kas ti panangbusbosda iti lima a bulan a naipamaysa a panagadal iti Biblia, pinaregtana ida: “Bayat nga umadani ti panungpalan, masarakanyonto a pumartak ti addang, rumigat ti dalan, nasang-at ti dalan. Ngem siguraduenyo a dikay mabannog, a dikay agsardeng, a dikay agikkat.”
Maysa kadagiti instruktor, ni Jack Redford, pinutarna ti tema a “Dikay Pagbalinen a Pagkapuyan ti Bilegyo.” Naibatay iti balakad ni Salomon a, “Dika aglabes nga Aglinteg,” namakdaar maipapan iti kasta unay a panagpannuray kadagiti personal a paglaingan imbes nga agpannuray ken ni Jehova. (Eclesiastes 7:16, 17) “Dagiti nakalablabes a naimbag a kababalin makaikulbo.” Kas pangarigan, ti maysa a ti linteg ken urnos ti bilegna ket mabalin a lablabsenna ti kasta a kababalin babaen ti panagbalinna a naistrikto unay. Gapuna, binalakadanna ti klase: “Sipapanunottay koma amin kadagiti pagkapuyantayo, ngem pagaammotay met koma ti bilegtayo. Aglintegkayo ngem saan a nalinteg iti bagina met laeng. Agpannuraykay ken ni Jehova. Pagbalinenyo a bilegyo ni Jehova.”
Ni Ulysses Glass, instruktor ken registrar ti klase, inlawlawagna dagiti sasao ni Jesus nga, “Alaenyo ti sangolko.” (Mateo 11:29, 30) Ditoy aw-awisen ni Jesus dagiti adalanna a makikadua kenkuana a ‘mangawit iti sangolna.’ Dina kayat a padagsenan ida. Kankanayon a sipapanunot iti kasapulan dagiti dadduma. Nangipakita iti kinapakumbaba. Dina inungtan dagiti adalanna. Kinuna ni Jesus, “Agsurokayo kaniak.” Ti misionero masapul a sipapanunot ken Kristo. Kinomendaran daytoy a nagpalawag ti klase iti espiritu ti kinamanagparaburda ket pinaregtana ida a mangitultuloy a mangipakita iti kasta met laeng nga espiritu iti ganggannaet a destinoda.
Bayat nga umadani ti panagserra ti session iti agsapa, ti miembro ti Manarawidwid a Bagi a ni Carey Barber nangipaay iti naganetget a palawag maipapan iti tema a “Ti Panagani Isu ti Panungpalan iti Sistema dagiti Bambanag.” Inturongna ti atension iti moderno a kaitungpalan ti ilustrasion ni Jesus maipapan iti trigo ken dagiti zizaña. (Mateo, kapitulo 13) Umuna, maurnong dagiti napulotan ken Kristo. Kalpasanna, nangnangruna nanipud idi 1935, ti sabsabali a karnero naikaduada a ‘naani.’ Nakaibanag ti Gilead School iti nakaskasdaaw a trabaho iti itutulong iti panagani kadagiti adalan ni Kristo.
Kalpasan a naited dagiti diploma kadagiti graduado, maysa kadakuada ti nangibasa iti nabara a surat a mangiyebkas kadagiti rikriknada maipapan iti pannakasanay ken atension nga inawatda manipud kadagiti instruktor ken ti pamilia ti Bethel. Iti pasetna, kinuna ti surat: “Ti interesyo kadakami saan laeng a kas maysa a klase iti Gilead no di ket kas indibidual pinaregtanakami ket maysa dayta a kurso a rumbeng a tuladen. Aglalaok ti riknami bayat ti panagsisinami—a maldaangankami a pumanaw ta mailiwkaminto kadakayo ngem maragsakan ken magagaran iti baro a destinomi.”
Maipaay iti programa iti malem, nakiraman dagiti graduado iti Panagadal ti Pagwanawanan nga inkondukta ni Ralph Walls. Kalpasanna nangidrama ti klase kadagiti tampok iti kapkapadasanda iti tay-ak ti ministerio bayat ti panagnaedda idiay Watchtower Farms. Ti Teaching Committee iti Manarawidwid a Bagi nangiparang ti programa dagiti pagkakatawaan a napauluan “Panagraem iti Autoridad Parang-ayenna ti Panagkaykaysa” ken ti maysa a pabuya ti slide a nangiparang iti rag-o a nakiramanan dagiti misionero kadagiti adu a dagdaga bayat dagiti adu a tawtawen. Nagpatingga ti programa babaen iti naimpusuan a kararag ni Frederick Franz, 95-años a presidente iti Watchtower Bible School of Gilead.
Babaen iti naganetget a panangsuportarda iti programa, dagiti timmabuno impamatmatda ti panangsuportarda kadagiti manamnama a misioneros ken ti panangapresiarda iti programa. Awan duadua a dagiti 24 a graduado iti maika-86 a klase iti Gilead determinadoda a mangaramid ken Jehova a bilegda bayat ti ipapanda iti naisangsangayan a destinoda iti tay-ak ti kinamisionero.
[Kahon iti panid 21]
KASASAAD DAGITI ESTUDIANTE
Bilang dagiti naasawaan: 12
Bilang dagiti estudiante 24
Bilang dagiti pagilian a naggapuan dagiti estudiante: 6
Bilang dagiti pagilian a nakaidestinuanda: 12
Promedio nga edad: 32.3
Promedio a tawen iti kinapudno: 14.1
Promedio a tawen iti amin-tiempo a ministerio: 9.1
[Ladawan iti panid 23]
Maika-86 a Klase a Nagraduar iti Watchtower Bible School of Gilead
Iti listaan iti baba, nanumeruan dagiti linea manipud sanga nga agpalikud, ket nailista dagiti nagnagan manipud kannigid nga agpakannawan iti tunggal linea.
(1) Parrott, R.; Imig, E.; Benig, G.; Bengtsson, E.; Baart, W.; Ihander, K. (2) Lewis, J.; Hilario, L.; Lindmark, A.; Antoncich, C.; Agurs, C. (3) Bengtsson, R.; Parrott, J.; Benig, J.; Imig, J.; Baart, A.; Rissell, S. (4) Rissell, M.; Lewis, L.; Antoncich, M.; Hilario, R.; Agurs, H.; Lindmark, L.; Ihander, J.