Aids—‘Pangrugian ti Baro a Moralidad’?
KALPASAN panangitudona iti kinuna ti maysa a doktor medikal a “ti interamente a maymaysa ti asawana a relasion” ti kakaisuna a pamay-an a malisian ti ikakapet ti AIDS babaen iti sekso, insaludsod ti maysa a mannurat ti editorial a taga Canada: “Ti kadi pagbutbutngan nga AIDS ti pangrugian ti interamente a baro a moralidad ditoy lubongtayo?” Pampanunoten pay met ti mannurat, no saan ngata a “karkarna” a ti insursuron ti Biblia kadagiti adu a tawtawen, nga awan sabali, ti monogamia, “isu itan ti banag a pakaisalakanan ti sangatauan.” Iti panangdakamatna met iti daytoy agdama a lubong “ti droga, tabako, alkohol ket saan a bassit, ti seksual a kinamanaglablabes,” kuna ti editorial: “Itan baybayadantayon ti ngina ti lubong ti pornograpiko, kinalulok, kinarugit a pinartuattayo.”
Nupay nasayaat met ti pananginanama ti irarang-ay ti kababalin ken ilalasat, ti laeng kadi panagbuteng ti nasapa nga ipapatay wenno panungpalan ti sangatauan ti makapataud “ti interamente a baro a moralidad”? Saan, ta agpapan pay pakdaar dagiti doktor ken managsirarak, kaaduan a mannigarilio ken nalabes panagin-inumda ti alkohol simamaag nga itultuloyda nga abusaren ti salun-atda, nga iyeg ti nasapa a panagpatingga ti biagda. Ken kuna pay dagiti dadduma a homoseksual nga itultuloyda ti maaddaan ti adu a kadendennada uray adda risgo ti ikakapet ti AIDS kadakuada.—Proverbio 10:21, 23.
Ania, ngarud ita, ti manglapped nga umiso ti panagaramid ti dakes? Siempre, ti nasalun-at a panagbuteng ken panagraem ken Jehova, a makitkita iti panagtulnog iti linlintegna maipapan ti moralidad. “Ti panagbuteng ken ni Jehova isu ti punganay ti pannakaammo.” Ket daytoy a kita ti pannakaammo ti mangpataud ti kinasirib a pudpudno a “mangigaga ti biag ti agikut kenkuana.”—Proverbio 1:7; Eclesiastes 7:12.
Nasken unay, ti editor, iti panagkunana a mabalin a makaptan ti AIDS babaen iti panangiyalison ti dara, nagsaludsod pay: “Saan kadi a nakakatkatawa a datayo nga interamente a mangkonkondenar kadagiti Saksi ni Jehova gaput’ panagmadida iti panangiyalison ti dara . . . ket ar-aramidentayo met laeng dayta a banag agpaay kadagiti dadduma a rason?”