No Apay a Tabunuanyo ti “Nadiosan a Debosion” a Kumbension Distrito
Ti makagunggona a tallo aldaw a panangisuro ti Biblia ti agur-uray kadakayo iti “Nadiosan a Debosion” a Kumbension Distrito dagiti Saksi ni Jehova mangrugi itoy a bulan. Babaen kadagiti makaisuro a diskurso ken interbiu ken maysa a drama, maipaayto dagiti napateg a panangiwanwan ti Biblia. Addakayto koman iti 8:50 iti agsapa ti Biernes inton mangrugi ti kumbension iti musikal a presentasion.
Itampok ti programa iti agsapat’ Biernes ti palawag a “Panangliklik iti Nasakit a Bibbibig” ken ti importante a diskurso maipapan iti namunganayan ti doktrina a Trinidad. Iti malem, mabagbagaanto dagiti nagannak a mangakseptar iti moral a responsabilidadda a mangipay ti naespirituan a patawid kadagiti annakda. Sumaganad, maparegtanto dagiti agtutubo a pagbalinen ni Kristo a modeloda ken pagbalinen a kukuadan ti kinapudno. Agpatingganto ti programa iti dayta nga aldaw iti panangisalaysay ti dakkel a sagana a maar-aramid nangnangruna tapno tulongan dagiti agtutubo.
Ti Sabado ket maysanto manen nga aldaw a napunno ti pannursuro a mangitampok ti bautismo iti agsapa ket iti malem dagiti napapateg a palawag maipapan iti Nakristianuan a Bagi a Manarawidwid ken no kasanotay a makitunos iti dayta itatta. Dagiti sesion iti malem agpatingga iti importante a palawag a “Ti Biblia—Saot’ Dios wenno iti Tao?”
Iti agsapat’ Domingo, ti naintiempuan a panangisuro ti mamakdaar maibusor “ti tao ti kinadakes” ken maibusor iti pannakaisiasi kadagiti bambanag maipapan ti taraon ken inumen, panagbubuok, ken panaglinglingay. (2 Tesalonica 2:3) Sarunuento daytoy ti maysa a moderno-aldaw a drama a mangipagpaganetget ti kinapateg ti panangipasakup ti bagbagitayo iti Dios. Kalpasanna, dikayto kayat a maikapis iti palawag publiko nga, “Asidegen ti Pannakaispal Dagidiay Addaan Nadiosan a Debosion!”
Bayat ti Disiembre, 1989 ken Enero, 1990, 34 a kumbension ti maangay iti intero a Filipinas laeng, gapuna addanto maysa nga asideg iti pagtaenganyo. Umuman kadagiti Saksi ni Jehova dita ayanyo maipapan ti oras ken lugar iti maysa a kaasitgan kadakayo.
Kumbension distrito idiay Verona, Italia