Ti Biag ken Ministerio ni Jesus

Dagiti Manakem ken Dagiti Naampang a Babbalasang

SINUNGBATAN ni Jesus ti kalikagum dagiti apostolna maipapan ti pagilasinan iti kaaddana iti pannakabalin ti Pagarian. Ita isut’ mangted pay kadagiti ramramit ti pagilasinan iti tallo a pangngarig, wenno ilustrasion.

Ti kaitungpalan ti tunggal pangngarig ket mapaliiwto dagidiay sibibiag bayat ti kaaddana. Inyam-ammona daydiay immuna kadagiti sasao a: “Ti pagarian ti langit maipadisto ngarud kadagiti sangapulo a babbalasang nga innalada dagiti pagsilawanda ket rimmuarda a sumabet iti nobio. Lima kadakuada ti naampang, ket lima dagiti manakem.”

Babaen kadagiti sasao a “ti pagarian ti langit maipadisto ngarud kadagiti sangapulo a babbalasang,” di kayat a sawen ni Jesus a kagudua kadagidiay agtawid ti nailangitan a Pagarian ket tattao a naampang ken kagudua met dagiti manakem! Saan, no di ket kayatna a sawen a maipapan iti Pagarian ti langit, adda kastoy wenno kasdiay a ramitna, wenno dagiti bambanag maipapan iti Pagarian ket kastanto wenno kasdiay.

Dagiti sangapulo a babbalasang isimboloda amin dagiti Kristiano a nakalinea wenno agkunkuna a nakalineada a maipaay iti nailangitan a Pagarian. Idi Pentecostes 33 K.P. a ti kongregasion Kristiano ket naitulag a maiyasawa iti napagungaren, naipadayag a Nobio, nga isu ni Jesu-Kristo. Ngem ti panagboda maaramidto idiay langit iti di naikeddeng a panawen iti masanguanan.

Iti ilustrasion, dagiti sangapulo a babbalasang rummuarda nga agpaay iti panggep a panangsabet iti nobio ken pannakikuyogda iti prusision ti kasar. Inton dumtengen, silawandanto ti ruta a pagnaanda babaen kadagiti pagsilawanda, iti kasta isut’ padpadayawanda bayat ti panangyegnat’ nobiana iti balay a naisagana nga agpaay kenkuana. Nupay kasta, inlawlawag ni Jesus: “Ta dagiti naampang idi innalada dagiti pagsilawanda saanda a nangikuyog iti lana, ngem dagidi manakem nangikuyogda ti lana kadagiti basoda agraman kadagiti pagsilawanda. Idi ngarud nagbayag daydi nobio, nagdungsada amin ket nakaturogda.”

Ti naipabayag a panagtaktak ti nobio ipamatmatna a ti kaadda ni Kristo kas agturturayen nga Ari ket adda pay laeng iti adayo a masanguanan. Iti kamaudianan isut’ dimteng iti tronona idi tawen 1914. Bayat ti napaut a rabii sakbay dayta, amin dagiti babbalasang nakaturogda. Ngem saanda a nailunod gapu iti dayta. Ti pannakakondenar dagiti naampang a babbalasang ket gaput’ saanda a panangikuyog ti lana kadagiti basoda. Ilawlawag ni Jesus no kasanot’ panagriing dagiti babbalasang sakbay ti idadateng ti nobio:

“Ngem iti tengnga ti rabii adda maysa a pukkaw, ‘Adtoyen ti nobio! Rummuarkayo a sumabet kenkuana.’ Idin amin dagiti babbalasang timmakderda ket tinarimaanda dagiti pagsilawanda. Ket dagiti naampang kinunada kadagiti manakem, ‘Ikkandakami iti lanayo, ta dagiti pagsilawanmi maiddepdan.’ Ngem dagiti manakem simmungbatda a kunkunada, ‘Tapno di agkurang ti maipaay kadakami ken kadakayo, inkayo kadagiti aglako ket gumatangkayo ti maipaay kadakayo.’”

Ti lana isimsimbolona no ania daydiay mamagbalin kadagiti pudno a Kristiano nga aglawag kas silsilaw, awan sabali, ti naipaltiing a Sao ti Dios, nga isut’ petpetanda a siiirut, agraman ti nasantuan nga espiritu, a tumulong iti pannakaawat iti dayta a Sao. Ti naespirituan a lana ti mamagbalin kadagiti manakem a babbalasang a mangisilnag ti silawda a mangabrasa iti nobio bayat ti prusision nga agturong iti pagbodaan. Ngem ti klase naampang a babbalasang awananda, kadagiti pagikabilanda, ti kasapulan a naespirituan a lana. Gapuna insalaysay ni Jesus no aniat’ napasamak:

“Ket idi [dagiti naampang a babbalasang] napanda gimmatang [ti lana], dimteng ti nobio, ket dagiti adda a nakasagana simrekda a kimmuyog kenkuana iti pagbodaan; ket ti ruangan napunitan. Idin immay metten dagiti dadduma a babbalasang nga agkunkuna, ‘Apo, apo, ilukatandakami!’ Ngem simmungbat ket kinunana, ‘Pudno kunak kadakayo, saankay nga am-ammo.’”

Kalpasan ti idadateng ni Kristo iti nailangitan a Pagarianna, ti klase manakem a babbalasang dagiti pudno a napulotan a Kristiano nakariingda iti pribilehioda a mangsilnag ti silawda iti daytoy nasipngetan a lubong kas panangdayawda ti nagsublin a Nobio. Ngem dagidiay iladladawan dagiti naampang a babbalasang saanda a nakasagana a mangipaay iti daytoy pangabrasa a pammadayaw. Gapuna inton dumteng ti tiempo, saanto nga ilukat ni Kristo ti ruangan ti pagbodaan idiay langit para kadakuada. Bay-annanto ida iti ruar idiay kasipngetan ti kaunggan a rabii ti lubong, a mapukawda agraman dagiti dadduma a managaramid ti kinadakes. “Agsalukagkay ngarud,” impatingga a kinuna ni Jesus, “ta dikay ammo ti aldaw ken oras.” Mateo 25:1-13.

◆ Asinodat’ isimsimbolo dagiti sangapulo a babbalasang?

◆ Kaano a naaramid ti kari a panagasawa ti nobio, ngem kaanot’ idadatengna a mangala ti nobiana idiay pagbodaan?

◆ Aniat’ irepresentar ti lana, ket ti panagikut iti dayta ti mamagbalin kadagiti manakem a babbalasang a mangaramid ti ania?

◆ Sadinot’ pakaaramidan ti boda?

◆ Ania a grande a gunggona ti pakaikapisan dagiti naampang a babbalasang, ket anianto ti pagtungpalanda?