Report Dagiti Manangiwaragawag ti Pagarian
Naimbag a Damag Manipud Norway
ADU a nasasayaat a kapadasan ti mapaspasaran dagiti nasurok a 9,500 a manangiwaragawag ti naimbag a damag ti Pagarian idiay Norway. Dagiti nasingpet-panagpuspusona malaslasinda ti mensahe ti Biblia nga iwarwaragawag dagiti Saksi ni Jehova kas isut’ kinapudno ken sungbat ti karkararagda, kas ipamatmat dagiti sumaganad a kapadasan:
◻ Maysa nga agtutubo a pagassawaan ti nagkararag iti Dios a tulonganna ida a masarakan ti panggep ti panagbiag. Kalpasan ti maysa a lawas simmarungkar dagiti Saksi ni Jehova, ket inawis ti asawa a babai a sumrekda. Napakdaaran ti asawa a lalaki kontra kadagiti Saksi, gapuna rimmuar manipud balay a mangdalus ti kotsena. Ti asawa a babai naiyanak idiay Lebanon ket adda problemana iti pagsasao, gapuna impakita dagiti Saksi ti nagan ni Jehova iti Bibliana nga Arabiko. Dua a lawas kamaudiananna nagsubli dagiti Saksi, ket naminsan manen a rimmuar ti asawa a lalaki a mangdalus ti kotsena. Insaludsod dagiti Saksi iti asawa a babai no patienna a ni lakayna ket addanto met inton sumaganad nga iyaayda tapno isunto ti agipatarus, ket inkari ti babai a dawatennanto dayta ken lakayna.
Iti maikatlo a panagsarungkar, nakadaldalus ti kotse a patien ti lalaki a saanna a mabalin nga usaren dayta kas pambar tapno rummuar manen, gapuna isut’ nagtalinaed ket nagadu ti salsaludsodna tapno makitana ti paggidiatan dagiti Saksi ken ti relihion ti Estado. Ti panagsarungkar nagpaut ti tallo nga oras, ken maysa a broshur ti naipaima iti pagassawaan. Idi pimmanawen dagiti Saksi, naturogen ti asawa a babai ngem ti asawa a lalaki rinugianna a binasa ti broshur, a kinitkitana dagiti kasuratan. Iti tengngat’ rabii riniingna ni baketna ket kunana: “Masapul a basaem daytoy.” Isut’ bimmangon, ket binasada a dua dayta aginggat’ alas sinko ti bigat. Gapu ta patienda a nasarakandan ti kinapudno, makasangitda pay iti ragsakda ket nagkararagda ken Jehova, nga us-usaren ti naganna. Maysa a regular a panagadal ti Biblia ti narugian kadakuada, ket nangrugida metten a makgimgimong. Ti lalaki immikkat iti trabahona iti militaria, ket naglusulosda iti simbaanda ken insardengdan ti panagsigsigarilioda. Itan nabautisarandan ken siraragsakda nga agserserbi ken Jehova a kadua dagiti kakabsatda a lallaki ken babbai iti intero a lubong.
◻ Dua a kakabsat a babbai nga adda iti ministerio a panagbalaybalay idiay Norway ti nakasarak ti maysa a babai a nangipakita ti interes. Inawisna ida nga agsubli ket insaludsodna no mabalinnat’ agawis ti dadduma pay a babbai. Iti sumaganad nga ibibisita, uppat a sabsabali a babbai ti immay. Maysa kadakuada ti aktibo unay iti simbaan. Kunana a nanipud kinaubingna, kayatnan ti agtulnog iti bilin ni Jesus nga agaramid ti ad-adalan. Daytoy ti nangiturong kenkuana idiay Africa a kadua ni lakayna iti maysa a proyekto a matultulongan manipud ballasiw-taaw. Amin dagiti babbai adut’ salsaludsodda, ket naiyurnos a dagiti kakabsat a babbai ti mangsarungkar kadakuada ti kada dua a lawas. Naawis met dagiti baro a kakaarruba, ket dadduma ti nagtultuloy nga umay nupay dadduma insardengdan ti itatabunoda, ngem daydiay aktibo a miembro ti simbaan inapresiarna a kinapudno ti maad-adalna. Maysa nga aldaw, idi ti ministro ti relihionda ti nagkuna a suportaranna ti gubat ken isut’ mamati iti doktrina a Trinidad, naglusulosen manipud simbaanda. Rinugiannan ti makigimgimong kadagiti Saksi ni Jehova ket di nagbayag makiramramanen iti trabaho a panangaskasaba. Di nagbayag kalpasanna isut’ nabautisaran. Kamaudiananna itan, kalpasan ti 30 a tawen, maragsakan iti pudpudno a panagtulnogna iti bilin ni Jesus nga agaramid ti ad-adalan.—Mateo 28:19.
Ni Jehova bembendisionanna dagiti kakabsat idiay Norway iti sagrado a serbisioda agraman dagidiay dumdumngeg ti naimbag a damag!