Maysa a Baro a Lubong Asidegen!

AGLAPLAPUSANAN dagiti plano a pangagas kadagiti an-anayen ti lubong. Iti kaaduan, aw-awaganda ti pannakaseknan ken kooperasion, agraman ti naindaklan a panagregget ti panagtutunos amin dagiti nasnasion iti intero a lubong. Adda ti panagrikna a no kumaron dagiti kasasaad, ti pannakasapul ti padapada a pannakaitalimeng pilitenna dagiti nasnasion a mangtingiting kadagiti ipangpangrunada ket agtrabahoda a sangsangkamaysa tapno mangbukel iti maysa a baro ken masustentuan a lubong. Ar-arapaapenda a makissayan ti dakkel dagiti badyet militar a pabor iti panangusar kadagiti kinabaknang a mangikkat kadagiti peggad ti aglawlaw ket, kas naikuna iti State of the World 1990, “imbes a taginayonen dagiti bukodda a dadakkel nga establisimiento ti depensa, mabalin nga agpannurayton dagiti gobierno iti ad-adda a napadakkel ken napapigsa a mangsalimetmet-talna a puersa ti U.N., daydiay addaanto ti pannakabalin ken autoridad a mangidepensa ti asinoman a miembro a pagilian a kontra iti asinoman a kabusor.”

Ngem dagita a plano agkurangda iti panangipaay kadagiti kasasaad nga il-iliwen kas nailista kadagiti panglukattay a panid. Dagiti basta natauan nga estratehia saanda a maagasan ti kinamanagbasol ken kinaagum ti tao; saanda a maikkat ti panagil-ilem ken etniko a gulo; saanda a makaibunga ti awan-imutna nga ayat iti sangatauan; ket saanda met a magarantisaran ti panagpatingga ti sakit ken ipapatay. Ti krimen saan a matartrato nga epektibo, awan met madakdakamat a panangparmek kadagiti narelihiusuan a supsuppiat ken guranggura. Ken ti panangikkat kadagiti natural a didigra saan pay a maus-usig. Ti nasionalismo, agraman pigsana a mangpataud ti parparikut, mapalpalubosan nga agtalinaed. Nakalkaldaang, maipatotay ngarud, a napaay dagiti tattao a mangiyeg iti agkurri a solusion.

Kaskasdi, adda met solusion! Kinapudnona, amin dagitoy banag nga il-iliwen ti sangatauan naikaridan, ket ti kari naggapu iti Dios a “dina mabalin ti agulbod.” (Tito 1:2) Ammona nga eksakto no aniat’ masapul a maaramid, ken isut’ addaan ti kinasirib, ti pannakabalin, ken ti abilidad a mangaramid iti pinanggepna.​—Apocalipsis 7:12; 19:1.

Inkari ti Dios: “Ta bassit pay a darikmat, ket ti nadangkes maawanton; wen, mingmingamto a sigaganetget ti ayanna, ket awanton. Ngem dagiti naemma tawidendanto ti daga, ket maay-ayatandanto iti kinaruay ti talna.”​—Salmo 37:10, 11.

Kasanot’ pannakatungpalto daytoy? Sumungbat ti Isaias 11:9: “Didanto mangranggas wenno mangdadael iti amin a bantayko a nasantuan; ta ti daga mapnonto iti pannakaammo ken ni Jehova, a kasla dagiti dandanum saknapanda ti baybay.” Wen, amin a sangatauan masursuruandanto “iti pannakaammo ken Jehova,” ket asinoman a madi nga agtungpal iti dayta saanto a mapalubosan nga agtalinaed ken mangdadael ti talna dagiti dadduma. Ti napintas a daga nikaanoman saanton a madadael.

“Imatanganyo ti ar-aramid ni Jehova . . . Pagsardengenna dagiti gubgubat inggana iti ungto ti daga,” inkari ti Salmo 46:8, 9. (Kitaenyo met ti Mikias 4:3, 4.) Ti nasken a banag tapno maiyeg ti sangalubongan a talna isut’ panamagpatingga kadagiti nasionalistiko a di pagkikinnaawatan. Magarantisaran ti panagtutunos, ta maymaysanto laengen ti adda a gobierno iti sangalubongan​—ti gobierno ti Dios. Ket ti gobiernona maysa a Pagarian “a nikaanoman dinto madadael.” (Daniel 2:44) Mainayon pay, ti Arina ket isu ti napagungar, imortal a Jesu-Kristo, a ti panagturayna ket babaento ti kinahustisia ken kinalinteg.​—Isaias 9:6, 7; 32:1.

Ngem dadaelento aya daytoy ti natawid a kinaimperpekto ti tao ken masinga babaen iti agtultuloy nga ut-ot, sakit, ladingit, ken ipapatay? Saan, ta dagitoy ket bambanagto metten a napalabas. Ipasiguro ti Apocalipsis 21:4 kadatayo: “Ket punasennanto ti amin a lulua kadagiti matada, ket awanton ni patay, ket awanto metten ti sasaibbek, wenno sangsangit wenno rigrigat. Ta dagidi immuna a bambanag napalabasdan.” Ti natawid a basol mapakawanton babaen iti daton a subbot ni Jesus, ket ti sangatauan maisublinton iti kinaperpekto. (Roma 6:23; Efeso 1:7) Ken asinot’ makakontrol a nasaysayaat pay kadagiti puersa naturales ken makalapped iti panangdangranda ti sangatauan no di ti Namarsuada?​—Salmo 148:5-8; Isaias 30:30.

Dagiti bambanag a mabalin laeng nga inanamaen ken arapaapen ti tao, ipaayto ti Dios. Ngem kaano? Ipamatmat ti padto ti Biblia a dagiti panagbalbaliw umaydanto iti tiempo inton dagiti nasnasion “makapungtotda” ket ti tao “daddadaelenna ti daga.” (Apocalipsis 11:18) Ti maudi nga al-aldaw ti daan a lubong tandaanto “dagiti panawen a napeggad a narigat a pakibagayan”​—nga agresulta iti ikakaro dagiti kasasaad a makitkitatayo iti aglalikmuttayo itatta. (2 Timoteo 3:1-5, 13) Ken impadto ni Jesus a ti kaputotan a makakita kadagita a bambanag isunto ti kaputotan a makakita ti kaitungpalan dagiti kari ti Dios.​—Mateo 24:3-14, 32-34.

Sipapasnek a sukimaten dagita a karkari a nailanad idiay Biblia. Ta iti daytoy a punto, agpadpada a dagiti mannakaammo a tattao ken ti Dios umanamongda: Itan ti tiempo maipaay iti maysa a baro a lubong!