Kasano Kasayaat ti Pannakaammoyo iti Biblia?
‘Ti libro ni Tomas? Wen, adda dayta idiay Biblia. Ngem ti libro ni Jonas ket awan. Ti nakaiyanakan ni Kristo? A, idiay Jerusalem dayta—wenno idiay kadi Nazaret? Diak talaga masiguro no ti libro ni Isaias ket adda iti umuna wenno maikadua a paset ti Biblia. Ti bilang dagiti apostoles? Diak talaga nga ammo.’
“DAGITOY a natakkuatan dida koma immay a surpresa no ti datos ket nakolekta kadagiti di Kristiano,” kuna ti magasin a Christianity Today. “Ti nakaskasdaaw—ken makariribuk—isut’ kadakkel ti Nainkasuratan a kinakuneng a nasarakan kadagiti born-again a Kristiano.”
Kas pangarigan, 22 porsiento kadagiti makunkuna a Kristiano a nasurbey impatoda nga adda a talaga ti libro ni Tomas idiay Biblia, bayat a 13 porsiento ti di sigurado. Maipapan ken Jonas, 27 porsiento ti nagkuna a daytat’ awan idiay Biblia, ket 12 porsiento ti awan ideyada. Innem a porsiento ti di makapugto no sadino ti nakaiyanakan ni Kristo, bayat a 16 porsiento ti nagkuna a Jerusalem, ken 8 porsiento kunada idiay Nazaret. Ket ti naan-anay a 13 porsiento awan ideyada no sadino ti pakasarakan ti libro ni Isaias idiay Biblia, bayat nga 11 porsiento ti nangikabil iti dayta iti Kristiano a Griego a Kasuratan (“Baro a Tulag”). Ket nupay kaaduan ti makaammo nga addada 12 nga apostoles, 12 porsiento ti nangted sabali a bilang, manipud 2 ingganat’ nasurok a 20, ken 10 porsiento ti awan ideyana a pulos.
Ti saludsod a nangted dakkel a gulo ket no ti sasao a “Ti Dios tulonganna dagidiay mangtulong ti bagbagida” adda idiay Biblia wenno awan. Adda laeng 38 porsiento kadagiti nasurbey a “Kristiano” ti makaammo a daytat’ di pulos masarakan idiay Biblia, bayat a ti kadakkelan a bilang, 42 porsiento, impagarupda a daytat’ naadaw idiay Biblia. Ti dadduma ket saanda nga ammo.
“Apay a kasta unay kadakkel ti kinakuneng iti Biblia?” insaludsod ti Christianity Today. “Mabalbalin, daytat’ gapu iti kinakurang ti panagbasbasa ti Biblia. Kagudua kadagiti amin nga Americano ti di agbasbasa ti Biblia. Kaaduan kadagiti amin a born-again a Kristiano basbasaendat’ Biblia maminsan wenno mamindua ti maysa lawas, wenno saan a pulos. Isu met laeng a nagadu a Kristiano nagbassitan ti ammoda maipapan iti Kasuratan!”