Malagipyo Pay Aya?

Nasarakanyo kadi dagiti nabiit pay a ruar ti Ti Pagwanawanan a praktikal ti pategda? Ngarud apay a diyo padasen ti memoriayo kadagiti sumaganad?

◻ Aniada a kinapudno ti sumungbat maibusor ti panangpadpadayaw iti maipagarup a lugar a nakayanakan ni Jesus?

Ti Biblia dina ibaga ti eksakto a lugar a nakayanakan ni Jesus. Ti salaysay ti Ebanghelio ni Mateo ken Lucas mangtedda laeng kadagiti simple a kangrunaan a bambanag. (Mateo 2:1, 5; Lucas 2:4-7) Ti panangbasa ti Juan 7:40-42 ipakitana a dagiti tattao iti pangkaaduan ket ignoranteda no maipapan ti nakayanakanna, dadduma pagarupenda nga isut’ naiyanak idiay Galilea. Kasta met, kabayatan ti mismo a naindagaan a biag ni Jesus, pulos a dina impablaak dagiti detalye maipapan ti pannakayanakna.​—12/15, panid 5.

◻ Kasano a mataginayon ti maysa a Kristiano ti rag-ona bayat a sumaranget kadagiti suot ti pisikal a sakit, panagladingit, ken kinarigat ti ekonomia?

Ipaay ti Sao ti Dios ti kasapulan a pannakaliwliwa ken pannakaiwanwan. Babaen panangbasbasa wenno panangdengngeg kadagiti salmo, maipaay ti kasapulan unay a pannakarepresko. Imbalakad kadatayo ni David: “Iyallatiwmo ta awitmo ken Jehova ket saranayennakanto.” Impasigurona met kadatayo a ni Jehova ket pudno “Managdengngeg ti kararag.” (Salmo 55:22; 65:2) Ti organisasion ni Jehova, babaen kadagiti publikasionna ken dagiti papanglakayenna iti kongregasion, adda a sisasagana a tumulong kadatayo a mangsaranget kadagiti problematayo.​—1/1, panid 14-15.

◻ Ania ti kayat a sawen ni Jesus idi nga iti dalanna nga agturong iti pannakailansana, kinunana: “Ta no iti kayo a nalangto aramidenda dagitoy a banag, ania ti aramidendanto iti nagango?” (Lucas 23:31)

Tuktukoyen ni Jesus ti kayo ti nasion a Judio. Gapu ti kaadda ni Jesus ken maysa a natda dagiti Judio a namati kenkuana, ti nasion adda pay laeng sumagmamano a langto ti biag kenkuana. Nupay kasta, idi nga amin dagitoy naikkatdan manipud ti nasion, ti laeng kayo a natay iti naespirituan ti agtalinaed, maysa a nagango a nasional nga organisasion.​—1/15, panid 9.

◻ Kasano a “dagiti nadalus ti pusoda,” a naibaga idiay Mateo 5:8, mabalinda a “makita ti Dios”?

“Makitada ti Dios” no maimatanganda nga agtigtignay iti biang dagiti manalimetmet kinatarnaw. (Idiligyo ti Exodo 33:20; Job 19:26; 42:5.) Nupay kasta, ti Griego a sao idiay Mateo 5:8 ipatarusna ti “makita” a kaipapananna met ti “makita babaen ti isip, maawatan, maammuan.” Yantangay perpekto nga insarming ni Jesus ti personalidad ti Dios, ti pannakaawat iti dayta a personalidad pagbalinenna “dagiti nadalus ti pusoda” a “makitada ti Dios.” (Juan 14:7-9)​—1/15, panid 16.

◻ Apay nga ibagatayo a ni Jesus isu ti Miguel arkanghel?

Dakamaten ti Sao ti Dios ti maymaysa laeng nga arkanghel, ket saritaenna dayta nga anghel kas panangtukoy ti napagungaren nga Apo Jesus: “Ti Apo met laeng aggapunto sadi langit a buyogen ti ariwawa, agraman ti timek ti arkanghel ken ti trumpeta ti Dios.” (1 Tesalonica 4:16) Idiay Judas 9 masarakantayo a ti nagan daytoy nga arkanghel ket Miguel.​—2/1, panid 17.

◻ Ania dagiti uppat a lugar a mabalintay ti mangipakita ti dayaw kadagiti tattao?

Mangipakitatay koma ti dayaw kadagiti napolitikaan nga agtuturay, kadagiti mangiyempleo, kadagiti miembro iti uneg ti pamiliatayo, ken dagidiay adda iti kongregasion.​—2/1, panid 20-2.

◻ Sakbay la unay ti ipapatay ni Jesus, ania a nasayaat nga ulidan ti impasdekna para kadagidiay addaan lallakay ken babbaketen a nagannak?

Bayat a sibibitin pay laeng ni Jesus iti rigat idiay kayo a pagtutuokan, nangipaay ti konsiderasion iti pisikal ken naespirituan a pagimbagan ti nanangna babaen panangitalekna kenkuana iti panangaywan ni ay-ayatenna nga apostol Juan. (Juan 19:25-27)​—2/15, panid 8.

◻ Apay kasapulan nga agsagaba ni Jesus?

Dagiti panagsagaba ni Jesus nagserbida a mangibanag ti isyu ti kinatarnaw dagiti ad-adipen ti Dios. Dagita ti nangkabal met kenkuana iti akemna kas maysa a naasi a Nangato a Padi ti sangatauan. (Hebreo 4:15)​—2/15, panid 14-15.

◻ Aniada a napapateg nga isyu ti pinataud ti panagalsa idiay Eden?

Kabaelan kadi nga iturayan ti tao ti bagbagina a sibaballigi a naisina

iti Dios? Nainkalintegan kadi iti biang ti Dios ti panangkalikagumna ti panagpasakop iti kinasoberanona? Dagiti kadi aniaman a tattao di siaagum a pilienda ti agserbi iti Dios iti kabukbukodanda a pangngeddeng?​—3/1, panid 6.

◻ Apay a dadduma di siuumiso a nakiramanda kadagiti emblema ti Memorial?

Dadduma a di nataengan a tattao mabalin nga awananda pay ti balanse nga apresasion iti pangpanggep ti Dios. Mabalin a dida bigbigen a ti panangpulot “agpannuray, saan nga aggapu iti mayat ket saan met nga iti agtaray, no di ket aggapu iti Dios.” (Roma 9:16) Saan nga agpannuray iti indibidual a mangikeddeng a kayatna ti maiyeg iti baro a tulag ken agbalin a makipagtawid ken Kristo. Ti napateg ket isu ti panangpili ni Jehova, ket ti espirituna paneknekanna dayta a panangpili. (Roma 8:16; 1 Corinto 12:18)​—3/15, panid 21.

◻ Ania ti “nadalus a pagsasao” a naibaga idiay Sofonias 3:9?

Dayta ti umiso a pannakaawat iti kinapudno maipapan ti Dios ken ti pangpanggepna.​—4/1, panid 21-2.