Report Dagiti Manangiwaragawag ti Pagarian
Nangipangag Dagiti Mangbirbiruk ti Kinapudno iti Impormal a Panangasaba
IPAKAAMMO ti Biblia kadatayo nga ipangagto dagiti marakarnero a tattao ti timek ti Naimbag a Pastor. (Juan 10:27) Isu daytoyen ti kaso kadagiti adu a daga, agraman ti Britania.
◻ Kas pangarigan, idi 1988, kasakbayan la unay ti Paskua, ni Pamela, maysa kadagiti Saksi ni Jehova, ti simmungbat iti telepono iti opisina a pagtartrabahuanna ket nakasaritana ti maysa nga agtagtagilako a lalaki nga agtartrabaho iti isu met laeng a kompania iti sabali a paset ti Inglatera. Iti pagnguduan ti iyaawag, insaludsod ti lalaki: “Nakasaganaka kadin para iti Paskua?” Kuna ni Pamela: “Saan!” “Saanka kadi a medio naladawen?” inyimtuod ti immawag. “Diak ramrambakan ti Paskua,” insungbat ni Pamela. Kuna ti lalaki a karkarna dayta ket dinamagna no apay. Imbaga kenkuana ni Pamela nga isut’ maysa kadagiti Saksi ni Jehova ket intuloyna nga inlawlawag nga awan ti bilin idiay Biblia a rambakan ti pannakaiyanak ni Jesus, ken maysa pay, saan a naiyanak ni Jesus iti Disiembre 25. Kasta pay met, ti Paskua ket maysa a pagano a rambak idi unana. Kuna ti immawag a makapainteres amin dayta iti panagdengngegna.
Tallo a bulan kalpasanna simmungbat ni Pamela iti telepono, ket kuna ti immawag: “Malagipmo kadi ti pannakisaritam kaniak sakbay ti Paskua ket kunam kaniak a saanmo a ramrambakan ti Paskua? Bueno, nasarakakon ti kinapudno!” Isu met laeng daydi a lalaki, ket inlawlawagna a dua a lawas kalpasan ti Paskua, dua a Saksi ti simmarungkar idiay balayna. Pinaunegna ida, ket nairugi ti panagadal ti Biblia. Insalaysayna nga isut’ nakaaramid ti napartak a panagrang-ay iti panagadalna. Imbagana iti ikabkabbalayna a nobiana a ti estilo ti panagbiagda ket saan a makaay-ayo ken Jehova, isu a nagsinada, ket ita agpadadan a tumabtabuno kadagiti gimong idiay Kingdom Hall.
Iti ngudo ti tawen, naawatdan kas di nabautisaran nga agibumbunannag, ket idi pangrugian ti 1990 nagkallaysada. Kalpasanna naggiddanda a nabautisaran. Nakapimpintas a resulta manipud maysa nga ababa, impormal a panangasaba iti telepono!
◻ Binendisionan ni Jehova ti sabali pay a kabsat a babai a nangasaba iti impormal idiay Inglatera. Idi a maysa nga ahente ti seguro ti immawag iti ruanganna, insaludsod kenkuana ti kabsat a babai no kayatna a mapasiguruan iti nasayaat a salun-at, kinaragsak, ken biag nga agnanayon. Wen kunana ket dinamagna no ania nga annuroten ti seguro ti ibagbagana. Gapu ti pannakaipakita kenkuana manipud Biblia ti kari ti Dios iti biag nga agnanayon iti Paraiso ditoy daga, inawatna ti maysa a kopia ti libro a Mabalinyo ti Agbiag nga Agnanayon iti Paraiso a Daga ket binasana ti intero a publikasion iti maysa laeng a rabii. Idi sinarungkaranna manen ti kabsat a babai, imbagana kenkuana a makapasiddaaw ti impormasion—no adda laeng koma pammati kenkuana tapno patienna dayta. Inlawlawag ti kabsat a babai a kasapulanna nga adalen ti Biblia ken tabunuan dagiti gimong iti Kingdom Hall. Naiyurnos ti panagadal ti Biblia, ket rinugianna ti itatabuno kadagiti gimong. Isut’ nabautisaran idi otonio iti dayta met laeng a tawen. Maysa la a tawen kalpasanna, inasawana ti balasang ti kabsat a babai a nangasaba kenkuana. “Gapuna,” kunaen ti kabsat a babai, “agpadpada a nakagun-odak ti maysa a kabsat a lalaki ken manugang babaen ti impormal a panangasabak!”
Maysa a kinapudno a mangipangag dagiti agsapsapul ti kinapudno no maidanon ti kinapudno ti Biblia babaen ti impormal a panangasaba. Kas kuna ni Jesus, dagiti karnerona dumngegda iti timekna.