Aniantot’ Mapasamak Kadagiti Nasantuan a Disso ti Kakristianuan?
DAGITI nangipablaak iti libro a Holy Places of Christendom, ni arkeologo a Stewart Perowne, iyimtuodda: “Siasino, iti aniaman a Nakristianuan a tradision ti pagtaudanna, ti makapagtakder idiay Kalbario idiay Simbaan ti Panagungar [wenno, Simbaan ti Nasantuan a Tanem] sadi Jerusalem nga awanan panagbuteng: ta ditoy iti maysa a lugar a nadaydayaw ken uray pay napaglalabanan kadagiti siniglo, ket isu a mismo ti sentro ti Kakristianuan.”
Awan nakapaneknek a daytoy a simbaan ket naipatakder idiay Kalbario, a nakatayan ni Jesu-Kristo. Kinapudnona, sakbay nga inkeddeng ni Romano nga emperador a Constantino a mamangon iti maysa a simbaan sadiay, maysa a pagano a templo ti adda iti dayta a disso. Kasta pay met, kuna ni Jesus: “Ti Dios maysa nga espiritu, ket dagidiay agdaydayaw kenkuana masapul nga agdaydayawda iti espiritu ken kinapudno.” (Juan 4:24) Dagiti kakasta a managdaydayaw dida daydayawen dagiti material a “nasantuan” a disso.
Naminsan, idiay Jerusalem ti ayan ti templo ti Dios ket ngarud isu ti sentro ti pudno a panagdayaw. Gapu iti di kinamatalek dagiti agnanaed iti siudad, nupay kasta, daytat’ pinanawan ni Jehova, kas impakpakauna ni Jesus. (Mateo 23:37, 38) Impakpakauna met ni Jesus ti pannakalangalang dayta a narelihiusuan a sentro, nga intultuloy a minatmatan ti adu kas nasantuan a disso. Natungpal dagiti saona idi a dagiti Romano dinadaelda ti Jerusalem ken ti templona idi 70 K.P.—Mateo 24:15, 21.
Ti padto ni Jesus di agbayag maaddaanen dakdakkel a kaitungpalan iti intero a relihiuso a masakopan ti Kakristianuan, nga ibilbilang met la daytoy kas maysa a nasantuan a disso. Ti Kakristianuan ken dagiti sagrado a dissona sangsanguenda itan ti pannakadadael babaen ti maysa a bumusor iti relihion a puersa a naawagan “ti nakaap-aprang a banag a mamagwalangwalang.” (Daniel 11:31) Maragsakan unay dagiti Saksi ni Jehova a mangipaay iti impormasion no kasanonto a maaramid daytoy a nakakigkigtot a pasamak.
[Ladawan iti panid 32]
Maysa a kapilia iti uneg ti Simbaan ti Nasantuan a Tanem
[Credit Line]
Pictorial Archive (Near Eastern History) Est.