Dagiti Buya Manipud Naikari a Daga

Isut’ Nangipaay Para iti Israel Idiay Sinai

PANUNOTENYO dagiti minilion​—lallaki, babbai, ken ubbing​—nga agturong iti maysa a “dakkel ken nakaam-amak a let-ang, nga addaan kadagiti nagita nga uleg ken manggagama ken addaan mawaw a daga nga awanan danum”!

Dagiti sasao ti Dios a masarakan idiay Deuteronomio 8:15 pagminarenna ti nagparang a kasla maysa a nakaam-amak a panagdaliasat nga adda iti sanguanan dagiti Israelitas bayat a pinanawanda ti Egipto ken nagmartsada agturong idiay let-ang ti Sinai. Maysa a dakkel a parikut: Asinot’ mangipaay iti umdas a taraon ken danum?

Dagiti Israelitas naadipendan idi idiay pay laeng sungaban ti Nilo, ngem saanda a nagkurang iti kasapulan. Dagiti naipinta kadagiti diding iladawanda ti pannakatipontipon dagiti ubas, sandia, ken sabsabali pay a bunga, kasta met iti ikan ken dinguen a mangbukel iti nagduduma a makan. Anian nga umiso ngarud, ti nagartem a reklamoda idiay let-ang: “Asinontot’ mangipaay kadatayo iti karne a kanentayo? Anian ti pannakalagipmi kadagiti ikan a kinkinnanmi idiay Egipto nga awan baybayadda, dagiti pepino ken dagiti morod ken dagiti kutsay ken dagiti lasona ken dagiti bawang!”​—Numeros 11:4, 5; 20:5.

Kalpasan a binallasiw dagiti Israelitas ti Nalabaga a Baybay, nagbannawagen kadakuada ti langa ti Sinai. Dida sinurot ti nanam-ay a dalan dagiti agtagtagilako nga agpaamianan no di ket nagkurbada agturong iti taraigid ti nagtallo kasuli a peninsula. Idi nakapagdaliasatdan iti agarup 80 kilometro idiay let-ang, kasla kasapulanda unayen ti danum. Dida mainum ti danum a masarakanda, ta dayta ket napait ken nalabit makaited kadagiti sakit. “Aniat’ inumentayo?” inyasugda. Bimmallaet ti Dios, ket pinagbalinna a nasam-it ti danum.​—Exodo 15:22-25.

Paliiwenyo ti buya ti nagsisilpo a kamelio iti ngato. Mabigbigyo ti saludsod a no kasano a makapagtultuloy ti Israel iti intero a let-ang agturong idiay Bantay Sinai. Kasanoda a makapagtultuloy nga agbiruk iti umdas a danum​—ken taraon​—agpaay kadakuada ken kasta met kadagiti arban ken pangen a kasapulanda a biagen?​—Exodo 12:38.

Immadayoda pay nga agpaabagatan ket di nagbayag nakasarakda iti makapabang-ar a danum ken taraon idiay Elim. (Exodo 15:27) Dayta, nupay kasta, ket saan pay nga isu ti papananda. Isudat’ agturong idiay “bantay ti pudno a Dios,” ti Bantay Sinai. (Exodo 3:1; 18:5; 19:2; 24:12-18) Dayta ket 120 kilometro pay ti kaadayona​—minilia a di nasimpa, namaga a daga.

Bayat a ti dakkel a grupo nagtultuloy agturong idiay Bantay Sinai, nakaasidegda​—ken nalabit nagsardengda idiay​—kangrunaan a salindeg a pagpaduman a pagaammo kas Feiran. Ti maysa a bassit a paset daytoy ket makita iti retrato iti kabinnatog a panid.a Daytat’ manipud iti maysa a desdes idiay let-ang, agturong idiay Nalabaga a Baybay (Gulf of Suez). Anian a pakabang-aran ti masarakanda sadiay!

Nupay ti let-ang ti Sinai nalabit pangkaaduanna a maitutop iti panangiladawan iti maysa a “dakkel ken nakaam-amak a let-ang,” dagiti Israelitas matagiragsakda ti linong dagiti natibker a palma ken sabsabali pay a kaykayo idiay salindeg ti Feiran. Makasarakda kadagiti umdas a nasam-it a pannakataraken, a mangipaay iti taraon nga insigida ken abasto a mabalinda nga itugot.

Amin dagitoy ket posible gapu ta ti danum iti uneg ti daga ket pumsuak diay Feiran. Panunotenyo no kasanot’ panagriknayo no addakayo idiay disierto a let-ang ket dagdagus a makasarakkayo iti nadalus a danum nga inumen! Iyilustrar daytoy nga uray idiay Sinai adda dagiti lugar a sadiay ti danum ket mabalin a magun-odan. No dadduma masapul a makali iti nauneg bassit ti maysa nga ubbog. Dakkel a trabaho ngarud ti panangsakdo kadagiti linigligason a karamba a napno itoy napateg a pluido, nangnangruna no dagiti arban ken pangen kasapulan a mapainumda. Iti daytoy a panawen dagiti Bedouin ti Sinai ket nakayawanda unay kadagiti bubon a sadiay makasakdoda iti danum maipaay kadagiti bagbagida ken kadagiti kamelioda.​—Idiligyo ti Genesis 24:11-20; 26:18-22.

Wen, agpapan pay kadagiti gundaway idi a nagpulkokda unay gapu iti kasla maysa a di maipamusposan a panagkurang, naaddaan dagiti Israelitas iti danum ken taraon. No dadduma simimilagro a nangipaay ti Dios kadagita. (Exodo 16:11-18; 31; 17:2-6) Kadagiti sabsabali pay a gundaway agparang nga indalanna ida iti “maysa a pagkamangan” a sadiay mapennek dagiti kasapulanda babaen kadagiti natural nga abasto. (Numeros 10:33-36) Kabayatan amin dayta, indatagna kadakuada ti kinaaglaplapusanan a nagur-uray kadagiti matalek idiay Naikari a Daga.​—Deuteronomio 11:10-15.

[Footnote]

[Picture Credit Line iti panid 24]

Pictorial Archive (Near Eastern History) Est.

[Picture Credit Line iti panid 24]

Pictorial Archive (Near Eastern History) Est.

[Picture Credit Line iti panid 24, 25]

Pictorial Archive (Near Eastern History) Est.

[Picture Credit Line iti panid 25]

Pictorial Archive (Near Eastern History) Est.