Ni Pablo Kontra ken Plato Maipapan iti Panagungar
NAGSURAT ni apostol Pablo maipapan ti panagungar idiay 1 Corinto 15:35-58 ken 2 Corinto 5:1-10. Iti panangaramidna ti kasta, sinurotna kadi dagiti imortal-a-kararua a kapanunotan ni Plato ken dagiti Griego a pilosopo, wenno makitunos kadi iti sursuro ni Jesus ken ti dadduma a Kasuratan?
Ti bukleta nga Immortality of the Soul or Resurrection of the Individual: St. Paul’s View with Special Reference to Plato, a naisurat idi 1974 ken inyawat ti arsobispo ti Greek Orthodox Church of North and South America, mangted ti mangipalgak a sungbat. Kalpasan ti panangilawlawagna ti kasasaad ti panagungar kadagiti naisitar a kasuratan iti ngato ken dagiti Helenistiko nga impluensia iti daydi a tiempo, nagteng ti autor ti sumaganad a pangserra a sasao:
“Isursuro ni Plato a ti kararua agtultuloy iti awan patinggana ken agnanayon a kaaddana, a naisina manipud iti bagi. Para ken Plato ti kararua ket kadawyan ken nainkasigudan nga imortal . . . Ni San Pablo dina isursuro ti kasta a panangmatmat ket awan aniaman a panangikunana nga isurona dayta . . .
“Saan a maseknan ni apostol Pablo iti imortalidad ti isip wenno espiritu kas nagsina ken nagduma a paspaset ngem ketdi iti panagungar ti intero a pakabuklan ti kararua-espiritu a bagi ti tao kas pagbanagan ti panagungar ni Kristo. Ti panangmatmat ni Pablo iti panagungar ti bagi ket awan pakainaiganna iti pannakaisubli ti biag dagiti natay a bagi manipud iti tanem.
“Ti panangmatmatna iti panagungar ti bagi mabalin a maiyebkas a nalawlawag pay kas ti pannakapagbalbaliw, pannakaparsua manen, ken pannakabukel manen, babaen ti pannakabalin ti Dios, ti intero a pakakaykaysaan ti tao, ti isu met laeng a persona, ti personalidad, ti psyko-somatiko mga organismo, ti pudpudno a psyko-pisikal nga indibidual, addaan kadagiti mental ken pisikal a kualidad. Ti panagungartayo iti masanguanan maaramidto saan a kas iti natural nga ik-ikutantayo, ngem kas ti natan-ok a sagut ti Dios.”
Wen, ti imortalidad ket saan a nainkasigudan a tagtagikuaen ti aniaman a tao. Imbes ketdi, maysa a napateg ken naparabur a sagut manipud ken Jehova baeten ken Apotayo a Jesu-Kristo kadagidiay mangbukel ti napulotan a kongregasion Kristiano.—1 Corinto 15:20, 57; Filipos 3:14.
[Ladawan iti panid 9]
Ti Griego a pilosopo a ni Plato
[Credit Line]
Retrato ti Vatican Museum