Tignayen ti Uram ti Programa a Panagibangon

“URAM! Uram! Maur-uram ti Assembly Hall dagiti Saksi ni Jehova!” Naiyikkis dayta iti maysa a malem ti Biernes idi Oktubre 1989 sadi Heerenveen, maysa nga ili iti makin-amianan a paset ti Netherlands.

Inus-usar dagiti Saksi ni Jehova daytoy a napintas nga Assembly Hall iti 11 a tawenen. Iti dandani tunggal ngudo ti lawas, ginasut ti aguummong sadiay maipaay iti dua-aldaw nga asamblea sirkito wenno maysa-aldaw nga espesial nga asamblea. Maysa dayta a komportable a lugar a pagsursuruan iti Biblia.

Napasamak ti aksidente bayat a mairingringpas ti atep ti patakder. Kalpasan ti sumagmamano laeng a minutos, nagpaaken ti pasdek. Imbag ta awan ti nadangran.

Nasayangan ngem saan a naupay, implano dagiti Saksi ti agibangon iti baro a pagasambleaan iti sabali a lugar. Nakasarakda iti maitutop a lugar sadi Swifterbant, iti probinsia ti Flevoland. Maysa dayta a nagaburan a lugar iti sigud a Zuider Zee a 5 metros iti baba ti patas ti baybay.

Nangrugi ti pannakaibangon ti baro nga Assembly Hall idi Enero 1991. Nasken a mairingpas dayta iti nagbaetan ti Mayo ken Setiembre 1991. Ginasut a Saksi ti nagboluntario nga agtrabaho, ket minatmatan ti sumagmamano nga agtutubo a lallaki ti proyekto kas pagtalaytayan nga agturong iti amin-tiempo a panagserbi ken Jehova. Adut’ timmulong a nagtrabaho manipud Belgium ken Inglatera.

Maysa a nasayaat pannakadiseniona a patakder ti naibangon. Adda pasilio a sarming ti atepna iti nagbaetan ti auditorium ken kapeteriana. Sangaribo ket walo a tattao ti malaon ti kangrunaan a pagtitiponan, ken 230 ti mabalin nga agbuya iti programa babaen ti telebision iti kaabayna a pagtitiponan.

Rinibo ti agkunkuna itatta: “Umaykayo, ket sumang-attayo iti bantay ni Jehova, ket isuronatayonto kadagiti dalanna.” (Isaias 2:2, 3) Daytoy baro nga Assembly Hall ket maysa laeng kadagiti adu a lugar a pakaipapaayan ti naespirituan a pannursuro. Kasta met ti lokal a Kingdom Hall dagiti Saksi ni Jehova. Masarakanyo sadiay ti nabara a panangabrasa.