Makasursuroda Kadagiti Oyukan

“Kadagiti nabiit pay a tawen, ad-adda a maawatanen dagiti inheniero ken dagiti diseniador ti produkto ti maysa a banag a nalawag a kanayon nga ammo dagiti uyokan: ti panangbukel iti uray nakaing-ingpis a banag nga innem ti sikiganna a balayda pagbalinenna dayta a natibtibker ngem ti dadduma nga itsura.”​—The New York Times, Oktubre 6, 1991.

SAANEN a pakasdaawan a magunggonaan dagiti tao manipud iti naannad a panangadal kadagiti insekto. Naminsan, ni Job, maysa a matalek a lalaki idi ugma, kinunana: “Ngem agsaludsodka ita kadagiti animal, ket isurodakanto; kasta met kadagiti tumatayab ti langit, ket ibagadanto kenka. . . . Asino ti di makaammo amin kadagitoy a ti ima ni Jehova inaramidna daytoy?” (Job 12:7-9) Wen, nalawag a makita ti sirib ti Namarsua kadagiti gagangay a bambanag a kas ti innem sikiganna a selula a makitayo iti rara.

Nupay ti kapuskol ti allid a diding dagitoy a selula ket agarup kakatlo laeng ti maysa a milimetro, dagitoy nakabilbilegda. Kinapudnona, maawitda ti agarup mamin-30 a daras ti dagsenda.

Mabalin nga usaren daytoy a bileg iti praktikal a pamay-an, kas kutson dagiti alikamen. Salaknibanna pay dagiti alikamen ti militaria a maiparasyut ditoy daga. Napaliiw ti The New York Times daytoy: “Dagiti bambanag a kas iti kadagsen ti dyip maigalutda kadagiti plataporma nga addaan iti ap-ap a rara a kutsonna no agdisso.”

Adu a kita ti materiales ti nausar kadagiti inaramid-tao a banag a kastoy ti diseniona. Kaaduanna ti naaramid iti papel. Ti papel a nylon ken resin ti linabagna ket nausar a mangbukel ti rara a mausar iti bagi dagiti dadakkel nga eroplano. Nakabilbileg uray no nalag-an. Apay? Angin ti nagyan ti nagbabaetan ti rara, isu a nalag-an. Nasayaat met nga insulasion ti angin.

Ti uyokan pudno a dina “ammo” amin daytoy, ta awan ti titulona iti inhenieria. Ngem inaldaw nga aramidenna ti trabahona babaen iti nakaisigudan a sirib nga inted ti Namarsuana, ni Jehova.