Makaallilaw Dagiti Langa
“DIKA agtaltalek kadagiti langa,” kinuna ti dramatista ti Irlandia a ni Richard Sheridan. Pudno daytoy kadagiti kayo kasta met kadagiti tao.
Maysa nga aldaw iti naladaw a Marso idi tawen 33 K.P., nakita ni Jesu-Kristo ti maysa a kayo a higos bayat a magmagnada a naggaput’ Betania a mapan Jerusalem kaduana dagiti adalanna. Nalasbang ti kayo, ngem ti as-asideg a panangmingming impalgakna nga awan pulos ti bungana. Kinuna ngarud ni Jesus iti dayta: “Uray kaanoman awan ti mangan ti bungam.”— Marcos 11:12-14.
Apay nga inlunod ni Jesus dayta a kayo idinto ta, kas ilawlawag ni Marcos, “saan a tiempo ti higos idi”? (Marcos 11:13) Bueno, no agpataud ti kayo a higos kadagiti bulong, gagangay nga agpataud met kadagiti nasapa a higos. Saan a gagangay iti maysa a kayo a higos ti agbulong iti dayta a tiempo ti tawen. Ngem yantangay addaan kadagiti bulong, nainkalintegan a ninamnama ni Jesus a makasarak kadagiti higos iti dayta. (Kitaenyo ti retrato nga adda iti ngato.) Ti kinapudno a nangpataud laeng dayta a kayo kadagiti bulong kaipapananna a di nabunga. Makaallilaw ti langana. Yantangay mabuisan dagiti kayo nga agbunga, kasapulan a mapukan ti di agbunga a kayo ta di isu pay a baybayadan.
Inusar ni Jesus dayta di nabunga a kayo ti higos a mangiyilustrar iti napateg a leksion mainaig iti pammati. Iti sumuno nga aldaw, nasdaaw dagiti adalanna a makakita a nagangon ti kayo. Inlawlawag ni Jesus: “Mamatikayo iti Dios. . . . Uray aniaman a dawatenyo no agkararagkayo patienyo nga awatenyon, ket maaramidto.” (Marcos 11:22-24) Malaksid iti panangiyilustrar ti pannakasapul iti panangikararag ti pammati, silalawag nga impamatmat ti nagango a kayo ti higos no anianto ti mapasamak iti maysa a nasion a kurang ti pammatina.
Sumagmamano a bulan sakbayna indilig ni Jesus ti nasion dagiti Judio iti maysa a kayo ti higos a saan a nagbunga iti las-ud ti tallo a tawenen ket kasapulan a mapukan no agtalinaed a di nabunga. (Lucas 13:6-9) Babaen ti panangilunodna iti kayo a higos uppat la nga aldaw sakbay ti ipapatayna, impakita ni Jesus no kasano a ti nasion dagiti Judio di nangpataud kadagiti bunga a maitutop iti panagbabawi ket iti kasta maikari iti pannakadadael. Nupay dayta a nasion—kas iti kayo a higos—aglanglanga a nasalun-at, ti as-asideg a panangmatmat impalgakna ti kinakurang ti pammati a nagtungpal iti panangilaksidda iti Mesias.—Lucas 3:8, 9.
Iti Sermonna iti Bantay, nangballaag ni Jesus maibusor “kadagiti ulbod a mammadto” ket kinunana: “Mailasinyonto ida gapu kadagiti bungbungada. Adda aya ubas a maala kadagiti kalkalunay, wenno higos kadagiti kaskasumba? Iti kasta tunggal kayo a nasayaat mangted bungbunga a nasayaat, ngem ti kayo a dakes mangted bungbunga a dakes; ti nasayaat a kayo saanna a mabalin ti mangted kadagiti bungbunga a dakes, kasta met ti kayo a dakes di met makaited ti bungbunga a nasayaat. Tunggal kayo a saan a mangted ti bunga a nasayaat, mapukan ket maisungrod iti apuy. Iti kasta, mailasinyonto ida gapu kadagiti bungbungada.” (Mateo 7:15-20) Silalawag nga ipakita dagitoy a sasao ni Jesus ken ti salaysay maipapan iti nailunod a kayo ti higos a kasapulantayo ti naespirituan a panagannad, ta dagiti relihiuso a panaglanglanga makaallilaw met.