“Dagiti Lirio iti Talon”

KINAAWAN panggedan. Ngumatngato a presio. Kinapanglaw. Panagsuek ti ekonomia. Sumansansan ti panagparang dagitoy a sasao kadagiti pagiwarnak. Ipamatmat dagitoy dagiti pakarigatan a sangsanguen ti minilion a mangikagkagumaan nga ipaayan dagiti pamiliada iti taraon, kawes, ken pagtaengan.

Agpadpada nga apektado dagiti mamati ken saan a mamati. Ngem saan laeng a dagiti mamati ti maipaspasango kadagita a parikut. Kinuna ni Jesus kadagiti napakumbaba a tattao idi umuna a siglo: “Imutektekanyo dagiti tumatayab ti langit, a dida agmula wenno agani wenno agurnong kadagiti kamkamalig; ket ni Amayo a nailangitan taraonanna ida. Saankayo aya a napatpateg unay ngem isuda?”​—Mateo 6:26.

Kinuna pay ni Jesus: “Usigenyo dagiti lirio iti talon, no kasano ti panagdakkelda; saanda nga agaramid, ket dida met mambi; ngem kunak kadakayo nga uray pay ni Salomon agraman ti isuamin a kinadayagna saan a nakawesan a kas iti maysa kadakuada. Ket no ti Dios kasta ti panangawesna iti ruot iti talon, . . . saan aya a nangnangruna a dakayo ti kawesannanto?”​—Mateo 6:28-30.

Kayat kadi a sawen daytoy a di kasapulan a mangged ti maysa a Kristiano a maipaay iti pagbiagna? Ay ket saan! Nasken nga igaed ti maysa a Kristiano ti agtrabaho tapno adda pagbayadna kadagiti kasapulanna. Kinuna ni apostol Pablo: “No adda madi nga agtrabaho, di met koma mangan.” (2 Tesalonica 3:10) Nupay kasta, sipapanunot ti maysa a Kristiano iti naayat a panangaywan ti Dios ken agtalek nga isut’ salsaluadan ti nailangitan nga Amana. Gapuna, saan a mariribukan kadagiti pakadanagan iti biag. Uray kadagiti narikut a panawen, ipangpangrunana dagiti naespirituan a bambanag. Mamati iti sasao ni Jesus: “Itultuloyyo a biruken nga umuna ti pagarian ken ti kinalintegna, ket isuamin dagitoy a bambanag mainayondanto kadakayo.”​—Mateo 6:33.