Report Dagiti Manangiwaragawag ti Pagarian
Nabirukanna ti Panggep iti Biag
KUNA ni Jesus nga ammona dagiti karnerona. (Juan 10:14) Ti tao a naimbag ti panagpuspusona ken addaan panagayat iti kinatalna ken kinalinteg, mapaasideg kadagiti paspasurot ni Jesus. Mabirukan ti kasta a tao ti panggep iti biag, kas iti maysa a babai idiay Belgium. Kastoy ti pakasaritaanna:
“Malmaldayak unay ket pampanunotek a kettelen ti biagko idi a sinarungkarandak dagiti Saksi ni Jehova iti pagtaengak. Nagustuak ti kinuna dagiti Saksi maipapan iti solusion kadagiti parikut daytoy masakit a lubong ngem diak kayat ti ideya a nairaman ti Dios. Walo a tawenen a diak makimismisa, ta kagurak ti kinamanaginsisingpet a nakitak sadiay. Ngem kadagiti Saksi, nailasinko a pudno dagiti imbagada ken nabigbigko a narigat nga agpayso ti agbiag nga awan ti Dios.
“Makapaliday ta, kalpasan ti sumagmamano nga isasarungkar, napugsat ti pannakipagadalko kadagiti Saksi. Napalalo ti ladingitko. Nagsigsigarilioak iti dua a pakete iti kada aldaw, ken rinugiak payen ti agusar kadagiti maiparit a droga. Iti panagtarigagayko a makauman ti pimmusayen nga apongko a lakay, sinumokko ti espiritismo. Kasta unay ti butengko idi a riniribukdak dagiti demonio kabayatan nga agmaymaysaak iti maysa a rabii kas banagna! Nagpaut daytoy iti sumagmamano a bulan. Rinabii a mabutbutengak no mapampanunotko nga agmaymaysaak.
“Iti maysa nga aldaw napanak nagpagnapagna, ket saan a kas iti sigud, sabali a dalan ti sinurotko. Nakagtengak iti maysa a lugar a pakaibangbangonan ti maysa a dakkel a patakder. Nasdaawak idi makitak ti nagadu a tao. Idi immasidegak, nabigbigko a dagidiay ket Saksi ni Jehova nga agipatpatakder iti Kingdom Hall. Nalagipko dagiti isasarungkar dagiti Saksi iti pagtaengak, ket napanunotko a nagsayaat ketdin no ti intero a lubong ket agbiag kas iti panagbiag dagitoy a tattao.
“Talaga a kayatko nga agsubli dagiti Saksi iti pagtaengak, isu a kinasaritak ti dadduma nga agtartrabaho iti Kingdom Hall-da. Nagkararagak iti Dios, ket kalpasan ti sangapulo nga aldaw ti lalaki nga immuna a simmarungkar kaniak addan idiay pagtaengak. Insingasingna nga itultuloymi ti panagadal iti Biblia, ket siraragsak nga immanamongak. Dagdagus nga inawisnak kadagiti gimong idiay Kingdom Hall. Immannugotak. Pulos a diak pay nakakitkita iti kasdiay! Nabayag idin a birbirukek dagiti tattao nga agiinnayat iti maysa ken maysa ken nararagsak. Ket kamaudiananna nasarakak met laeng ida!
“Kalpasan daydi tumabtabunoakon kadagiti amin a gimong. Kalpasan ti agarup tallo a lawas, insardengkon ti agsigarilio. Imbellengko dagiti librok iti astrolohia, ken dagiti plakak nga addaan kadagiti sataniko a musika, ket nariknak a limmukay ti panangpetpet dagiti demonio kaniak. Intunosko ti panagbiagko kadagiti pagalagadan ni Jehova iti Biblia, ket kalpasan ti tallo a bulan rinugiakon nga inkaskasaba ti naimbag a damag. Kalpasan ti innem a bulan, nabautisaranak. Dua nga aldaw kalpasan ti pannakabautisarko, rinugiak ti nag-auxiliary payunir.
“Agyamanak ken Jehova kadagiti amin nga inaramidna para kaniak. Naaddaan met laeng iti panggep ti biagko. Wen, ti nagan ni Jehova ket nabileg a sarikedked nga isut’ kamang ken salindegko. (Proverbio 18:10) Pudno a nariknak ti kas iti narikna ti salmista idi nga insuratna ti Salmo 84:10: ‘Ti maysa nga aldaw iti paraanganmo nasaysayaat ngem iti sangaribo iti sabali a disso! Kaykayatko laengen ti agbantay iti ruangan ti balay ti Diosko ngem ti panagnaed kadagiti kalapaw ti kinadangkes.’”
Nabirukan daytoy naemma ti panagpuspusona a babai ti panggep iti biag. Mabirukan met ti siasinoman a mangsapul ken Jehova nga addaan naimbag a panagpuspuso.