Maysa a Rabii a Malaglagip

ITI maysa a nakallalagip nga aldaw, nasurok a 3,500 a tawenen ti napalabas, imbilin ni Jehova a Dios kadagiti Israelita a naadipen idiay Egipto a mangpatayda iti maysa kordero ket iwarsida ti darana kadagiti baotek ken ngatuen dagiti ruangan ti balbalayda. Iti dayta a mismo a rabii, linabsan ti anghel ti Dios ti balbalay a natandaan iti kastoy a pamay-an ngem pinapatayna dagiti inauna nga annak a lallaki nga adda iti uneg ti pagtaengan dagiti Egipcio. Kalpasanna nawayawayaan dagiti Israelita. Manipud idin, kas panglaglagip iti dayta a pasamak, rinambakan dagiti Judio ti Paskua.

Kalpasan la unay ti maudi a panangrambak ni Jesu-Kristo iti Paskua a kadua dagiti apostolna, nangiyussuat iti maysa a pangrabii a mangipalagip iti sakripisio nga ipapatayna. Impasana kadagiti matalek nga apostolna ti tinapay ket kinunana: “Alaenyo, kanenyo. Daytoy kaipapananna ti bagik.” Kalpasanna inikkanna ida ti sangakopa nga arak ket kinunana: “Uminumkayo manipud iti dayta, dakayo amin; ta daytoy kaipapananna ti ‘dara[k] iti tulag,’ a maiparukpok maigapu iti adu a maipaay iti pannakapakawan dagiti basol.” Kinuna pay ni Jesus: “Itultuloyyo nga aramiden daytoy kas panglaglagip kaniak.” (Mateo 26:26-28; Lucas 22:19, 20) Gapuna binilin ni Jesus dagiti pasurotna nga itultuloyda daytoy a panglaglagip iti ipapatayna.

Sipapasnek nga awisendakayo dagiti Saksi ni Jehova a makipagrambak iti Panglaglagip iti ipapatay ni Jesus. Mabalinyo ti tumabuno iti Kingdom Hall a kaasitgan iti pagtaenganyo. Makiumankayo kadagiti Saksi iti lugaryo maipaay iti eksakto nga oras ken lugar. Ti petsa maipaay iti panglaglagip iti 1994 ket Sabado, Marso 26. Maiwaras ti tinapay ken ti arak kalpasan ti ilelennek ti init.