Napatpateg Ngem Dagiti Korales
Umad-adu dagiti bisita a maragragsakan kadagiti buya kas iti daytoy iti danum ti Nalabaga a Baybay.
Dagiti di mabilang nga ikan nga arig-bullalayaw ti marisda ket makakayaw kadagiday agbatbatok kadagiti nalitnaw a danum. Ngem paliiwenyo ta iti aglikmut dagiti namaris nga ikan a makita ditoy, adda dagiti dadduma pay a makaawis a pagsidsiddaawan iti uneg ti baybay, a pakairamanan dagiti agkakapintas a de kolor a korales.
Nadumaduma ti langa ken maris dagiti napipintas a korales. Kas mabalin nga ipagarupyo, uray idi un-unana a tiempo maipatpateg unay dagiti nangayed a kapisi a korales. Dagitoy ti aramiden dagiti artesano a makaay-ayo nga arkos, ket dakamaten dagiti mannurat ti Biblia dagiti korales agraman ti balitok, pirak, ken dagiti rubi. (Proverbio 3:14, 15; Ezequiel 27:16) Ngem dagidiay a mannurat tulongandatayo a mangmatmat iti nalablabes pay ngem iti kinapintas ken kinapateg dagiti korales a mismo.
Intampokda a napatpateg dagiti dadduma a bambanag ket rumbeng nga ipategtay dagitoy nga ad-adda. Karaman kadagitoy ti naimbag, natalunggadingan nga asawa a babai, ta mabasatayo: “Ti natalunggadingan nga asawa a babai asino ti makasarak? Ti pategna nangatngato nga amang ngem dagiti korales.” (Proverbio 31:10) Maysakay aya a kasado a lalaki? Matmatanyo manen dagiti makaay-ayo a korales ditoy, ket panunotenyo no ipatpategyo met laeng ni baketyo kas pakaikarianna.
Lallakitay man wenno babbai, addaan asawa wenno agwaywayas, ti panangmatmat kadagiti nangayed a korales ti tumulong koma kadatayo a mangapresiar iti dakdakkel a pateg ti nadiosan a sirib, pannakaawat, ken pannakaammo. Kunaen ti Sao ti Dios: “Naragsak ti tao a makasarak iti sirib, ken ti tao a makagun-od iti pannakaawat, ta ti pannakagun-od iti dayta nasaysayaat ngem pannakagun-od ti pirak, ket ti magunggona kenkuana nasaysayaat ngem balitok a nasudi. Napatpateg ngem dagiti korales, ket awan kadagiti bambanag a mabalinmo a tarigagayan ti mayasping iti dayta.”—Proverbio 3:13-15; 8:11.
Isu a makitatay man dayta iti panagbatoktayo wenno babaen iti ladawan, dagiti korales iti Nalabaga a Baybay rumbeng a mangipasimudaag kadatayo agpadpada iti kinapintas ken banag a makagunggona nga utoben.