“Sinalaknibandak Dagiti Saksi ni Jehova!”

KADAGITOY maudi nga al-aldaw, adu dagiti “narungsot, awanan panagayat iti kinaimbag.” (2 Timoteo 3:1, 3) Ni Isaac, maysa a boluntario a ministro iti sanga nga opisina ti Watch Tower Society idiay West Africa, napaneknekanna daytoy a pudno. Kinunana:

“Idi Enero 1992, agbibiaheak idi iti awan matagtagitaona a kalsada iti taksi a kaduak ti lima a dadduma pay a pasahero. Rinugiak ti nakisarita iti babai a nakatugaw iti abayko, ket siraragsak nga inawatna ti naibatay-Biblia a broshur.

“Pagammuan, iti agarup alas kuatro iti malem, maysa a baro a kotse nga awanan plate number ti simmardeng iti sanguananmi, ket nagpreno iti napigsa ti luganmi. Tallo a nababaneg a lallaki, tunggal maysa adda riplena, ti rimmuar iti lugan ket ginutadda dagiti ridaw ti luganmi. ‘Rummuarkayo, dakayo amin,’ imbugkaw ti maysa kadakuada.

“Sinibbarut ti sabali a lalaki ti bagko a naglaon kadagiti libro. Idi makitana a naglaon laeng kadagiti literatura ti Biblia, impalladawna ti bag. ‘Ania pay ti adda kenka?’ sinaludsodna, a nakapaturong ti paltogna kaniak. Sidadaras nga intedko kenkuana ti kuarta iti pitakak. ‘Daytoy laeng?’ kinunana. Imbagak kenkuana a maysaak kadagiti Saksi ni Jehova ket dagiti Saksi dida agul-ulbod. Sinibbarutna ti pitakak, nakitana ti Watch Tower identification card-ko sana kinuna, ‘Ok, Watchtower. Agurayka ditoy.’

“Kalpasanna, insublatna ti babai a kinasaritak iti taksi. Sidadaras nga inikkatna ti kuentasna sana inted ti kuarta iti pitakana. Idi nakita ti tulisan ti broshur iti agtigtigerger nga ima [ti babai], impagarupna nga agkaduakami, isu nga imbagana kenkuana nga umabay kaniak.

“Kabayatanna, dagiti dadduma a tulisan siraranggas a pinarigatda dagiti kinalugananmi. Dinanog ken rinabsutanda ti driver ken ti maysa a lalaki a kinalugananmi. Rinabsut ti maysa a mannakaw ti kuentas ti maikadua a babai. Idi limmaban, siraranggas a pinalekda ti ulo ken ti barukongna iti putan ti paltog agingga a natay. Ti maikatlo a babai ket inulodda nga inruar iti lugan sada pinaltogan iti barukongna. Nakaay-ay-ay ta natay met. Siak laeng ken ti agkabanuag a babai iti abayko ti nabati a pulos a di naan-ano.

“Idi nakalugankamin iti limmabas a motorista, maulit-ulit nga ibagbaga ti maam-amak a babai, ‘Sinalaknibandak dagiti Saksi ni Jehova!’”