Ti Nabileg a Pammati Dagiti Kakabsattayo a Taga-Rwanda
IDI rugrugi ti 1994 nagkintayeg ti lubong iti panagruar dagiti damag maipapan iti nasaknap a panangpapatay idiay pagilian a Rwanda iti Africa. Bimtak ti maysa a nadawel a guerra sibil—ti kangitingitan ti sinigsiglon kapautna a panaggiginnura.
Naipasango iti naan-anay a kinaawan linteg ken urnos, napilitan ti nasurok a 2,000 a Saksi ni Jehova idiay Rwanda a pumanaw tapno maispal ti biagda. Ag-1,300 ti nagkamang kadagiti kampo a pagkamangan iti kabangibang a Zaire ken Tanzania, ngem saan a nakapagkamang dagiti dadduma a nasapsapa. Maladingitankam a mangipadamag nga ag-400 kadagiti kakabsattayo—agpadpada dagiti nataengan ken ubbing, ket siempre sibilianda amin—ti natay iti dayta a nadawel a kinaranggas. Maladingitan dagiti Kristiano iti intero a lubong iti ipapatay dagitoy natured a manangsalimetmet-kinatarnawda ken magun-odda ti liwliwa iti kari ti Biblia maipapan iti panagungar.—Juan 11:25.
Komusta met ngay dagidiay nakalasat a kakabsat a taga-Rwanda? Naibaon dagiti panglakayen manipud iti sumagmamano a pagilian a mangsukimat a mismo kadagiti bambanag. Kinuna ti maysa a report a sangsanguen dagiti kakabsat a taga-Rwanda ti kasasaad a “buyogen ti dakkel a dayaw ken tured.” Kas pagarigan, ti maysa kadagiti immuna a kiniddaw dagiti kakabsat isu dagiti literatura iti Biblia. ‘Agparang nga ad-adda a maseknanda maipapan iti pananggun-od iti naespirituan a taraon imbes a material a tulong, nupay agkasapulanda unay iti adu a bambanag,’ ingngudo ti report. Ket nupay saan a komportable dagiti kasasaad kadagiti kampo, ‘ti yan dagiti kakabsat ti kadadalusan a paset.’
Nangipaay ti Watch Tower Society iti pundo a paggatang kadagiti taraon, ules, kawes, sapatos, ken agas. Sibubuslon a nagidonar dagiti kakabsattayo idiay Francia, ket idi rugrugi ti Hunio, agarup dua a tonelada nga abasto ti naipatuloden kadagitoy nga agkasapulan a kakabsattayo a taga-Rwanda.
Saan a pakasdaawan, nagbanag dagitoy a kasasaad iti nasayaat a pammaneknek. Natukay ti rikna dagiti managpaliiw iti banag a dagiti kakabsattayo a taga-Rwanda immawatda ti kakasta a tulong ken suporta manipud kadagiti padada a Saksi, ken nagbalin a posible nga iranud daytoy a tulong kadagiti sabsabali. Naikuna met ti dadduma a dagiti laeng Saksi kadagiti kampo ti nasarungkaran dagiti kameng ti relihionda!
Ti nakakaasi a kasasaad dagiti kakabsattayo a taga-Rwanda ipalagipna kadatayo a kadagitoy “maudi nga al-aldaw,” agbalin dagiti tattao a “narungsot” ken “naranggas.” (2 Timoteo 3:1-5; Today’s English Version) Ket nupay saan nga ikari ni Jehova kadagiti tattaona ti namilagruan a pannalaknib manipud kadagiti pisikal a peggad, inkarina a saluadanna ti espiritualidad ken pannakirelasionda kenkuana ken, bayat ti Milenio a panagturay ni Kristo, pagungarenna dagidiay matay ita. (Salmo 91:1-10) Sapay koma ta itultuloytay nga ikararagan dagiti sibibiag a kakabsattayo a taga-Rwanda a tarabayen ken tulongan ida ni Jehova iti daytoy a panawen ti pannubok.—Salmo 46:1.