Bang-ar Kadagiti Inosente a Biktima

MAYSA daytoy kadagiti kaaaprangan a krimen a naaramid ti tao​—ti ritual a panangidaton kadagiti annak. Saan a patien ti dadduma a a napasamak ti kasta a nakarimrimon nga aramid. Ngem daytoy a paset ti panagdaydayaw dagiti taga-Fenicia ket pasingkedan ti adu a takuat ti arkeolohia.

Dagiti annak kadagiti natan-ok a pamilia ket naidaton iti apuy kadagiti dios a kas kada Tanit ken Baal-Hammon. Idiay Carthage, dagiti ubbing a biktima ket napuoran ken naidaton iti bronse nga estatua ni Kronos. Kuna ni Diodorus Siculus, maysa a historiador idi umuna a siglo K.K.P., a di mapalubosan nga agsangit dagiti kabagian ti ubing. Nalabit a pinatida a dagiti lua ti panagladingit pabassitenna ti pateg ti daton.

Naaramid met idi ti umasping a ritual iti asideg ti Jerusalem idiay kadaanan a Tofet. Agsala sadiay dagiti managdaydayaw ken agtamborda iti napigsa tapno saan a mangngeg ti sangit ti ubing bayat a maipalladaw iti umap-apuy a tian ni Moloc.​—Jeremias 7:31.

Nakapungtot unay ni Jehova kadagidiay awan-asina a di nangikankano iti saem a napasaran ti sabsabali. (Idiligyo ti Proverbio 21:13.) Kas Dios a mangipakpakita iti asi kadagiti ubbing, sigurado nga iramanto ni Jehova dagiti kasta nga inosente a biktima iti “panagungar agpadpada dagiti nalinteg ken dagiti nakillo.”​—Aramid 24:15; Exodo 22:22-24.