Agsilnag Koma ti Silawyo!

KAMAUDIANANNA, dimtengen ti tiempo tapno makita ti maysa a lakay ti naikari a Mesias! Babaen ti nadiosan a panangipalgak ammo ni Simeon a “dinanto makita ni patay sakbay a makitana ti Kristo ni Jehova.” (Lucas 2:26) Ngem anian a makaparagsak idi simrek ni Simeon iti templo ket impaubba da Maria ken Jose ni maladaga a Jesus! Indaydayawna ti Dios, a kunkunana: “Ita, Soberano nga Apo, palpalubosamon ti adipenmo a mapan a siwayawaya a sitatalna . . . agsipud ta dagiti matak nakitadan ti wagas a panangisalakanmo . . . maysa a silaw a pangikkat iti abbong manipud kadagiti nasion ken maysa a dayag iti ilim nga Israel.”​—Lucas 2:27-32; idiligyo ti Isaias 42:1-6.

Ni Jesus, manipud iti pannakabautisarna iti edad a 30 agingga iti ipapatayna, napaneknekan kas maysa a “silaw” iti lubong. Kadagiti ania a pamay-an? Insilnagna ti naespirituan a lawag babaen ti panangikasabana iti Pagarian ti Dios ken dagiti panggepna. Imbutaktakna met dagiti palso a narelihiosuan a sursuro ken sibabatad nga impabigbigna dagiti aramid a kukua ti kinasipnget. (Mateo 15:3-9; Galacia 5:19-21) Gapuna, siuumiso a maikuna ni Jesus: “Siak ti silaw ti lubong.”​—Juan 8:12.

Natay ni Jesus idi tawen 33 K.P. Napukaw kadi ti lawag sipud idin? Pulos a saan! Bayat nga adda pay ditoy daga, kinuna ni Jesus kadagiti adalanna: “Agsilnag koma ti silawyo iti sanguanan dagiti tattao.” (Mateo 5:16) Maitunos iti daytoy, nagtultuloy a pinagsilnag dagiti pasurot ni Jesus ti silaw kalpasan ti ipapatayna.

Kas panangtulad ken Jesus, iyan-anninaw dagiti Kristiano ita ti lawag ni Jehova babaen ti pannakiraman iti trabaho a panangasaba. ‘Itultuloyda ti magna kas annak ti lawag,’ a pampaneknekanda ti bagbagida kas rumimrimat a pagwadan iti Nakristianuan a panagbiag.​—Efeso 5:8.