Sinaranay ti Katan-okan a Gayyemda
MAYSA a pannakigayyem ti nangnangruna a mangsarsaranay kadagiti Saksi ni Jehova. Isu ti napateg a relasionda iti katan-okan a Gayyemda, ni Jehova a Dios. (Idiligyo ti Santiago 2:23.) Tultulonganna ida kabayatan dagiti nakaro a pakasuotan ti pammati.
Indaydayaw ti adu a managpaliiw ti rekord ti kinatarnaw dagiti Saksi iti sidong dagiti totalitariano a panangituray. Maysa kadakuada ni Jiří Krupička, maysa a doktor ti pilosopia ken natural a siensia nga immakar manipud Czechoslovakia idi 1968 kalpasan ti adu a tawen a kaaddana kadagiti kampo konsentrasion ti Komunista. Iti librona a Renesance rozumu (Renaissance of Intellect), nagkomento maipapan iti panagsagaba ken kinatibker dagiti Saksi a naibalud gapu iti neutralidadda.
Iti sidong ti gobierno a Komunista, adu a Saksi ti nasentensiaan iti pannakaibalud gapu iti pammatida. Nupay naibaludda, nagkedkedda nga agminas iti uranium a pakigubat. (Isaias 2:4) Iladawan ni Krupička ti nakitana iti maysa kadagitoy a pagminasan idi 1952. Nakitana ti dua a nakatakder a kasla estatua a nabungon iti yelo iti nakaro a panawen ti kalam-ekna. Nakaluban dagiti ulo ken akinngato a paset ti bagida kadagiti bariles a metal.
Insurat ni Krupička: “Nakatakderdan sadiay a rutayrutay ti kawesda manipud iti parbangon. Kasano a makapagibturda nga agtakder a nakabaybayag a kimteren dagiti sakada? Babaen ti bileg ti pammati. Nakadadaan ken aglatlatin dagiti bariles. Nakapigpigsa ti panangiduron ti maysa a naranggas a tao kadagiti ulo ken abagada ta uray la a naiwa ti jacket agingga iti kudil ti maysa kadagiti lallaki gapu iti natadem a ngarab ti bariles, ket nagaruyot ti dara manipud iti manggasna.
“Pinasardeng ti guardia ti panagmartsami iti sanguananda, ken nangted ti komandante iti ababa a bitla kadakami. Kinunana nga iyaalsa ti panagkedked nga agtrabaho, ket madusa gapu iti dayta. Ti awan kaes-eskanna a sentimiento maipapan iti gubat ken pammapatay saan a makatulong kadagitoy a bumusbusor, dagitoy a kabusor ti sosialismo.”
Pimmidut ti komandante iti pang-or a landok ket pinang-orna ti maysa kadagiti bariles. Nadalutaytay ti lalaki nga adda iti uneg dayta a nakakalub pay laeng ti bariles iti ulona. Malaglagip unay ni Krupička ti simmaganad a napasamak.
Kunana: “Adda agkankanta iti uneg dagiti bariles. Naalumamay nga uni, arasaas a kararag iti Dios, a mangngeg iti aniaman a banag manipud iti sadinoman—uray pay ti panangpadpadas nga agkanta iti uneg dagiti daan, aglatlati a bariles ti uranium. Mangngegna a napigpigsa pay ngem iti maysa a koro iti dakkel a katedral.”
Idi Setiembre 1, 1993, naaddaan iti opisial a legal a pannakabigbig ti trabaho dagiti Saksi ni Jehova iti Czech Republic. Maragsakan itan dagiti Saksi a Czech a mangitultuloy iti Nakristianuan nga edukasional a trabahoda a siwayawaya. Wen, maragsakanda a mangibaga kadagiti sabsabali maipapan ken Jehova, ti katan-okan a Gayyemda.
[Ladawan iti panid 7]
Dagiti kombensionista iti Czech Republic