Agpadispensar ti Dati a Hues—Kalpasan ti 45 a Tawen
ITI maysa a pangukoman idiay Berlin, idi Agosto 1995, impeksa ti maysa a dati a hues iti Korte Suprema iti maysa kadagiti Saksi ni Jehova ti panagbabawina gapu iti biddut a naaramidanna 45 a tawenen ti napalabas.
Idi Oktubre 1950, indeklara ti Korte Suprema ti German Democratic Republic (GDR) a nakabasol ti siam kadagiti Saksi ni Jehova iti panangriribuk ken panagsimisim maibusor iti estado. Dua ti nasentensiaan iti tungpal-biag a pannakaibalud ken ti dadduma pay a pito—a pakairamanan ni 22 ti tawenna a Lothar Hörnig, ti nausig a maikapat manipud iti kannawan iti ladawan—ti nasentensiaan iti napaut a pannakaibalud.
Uppat a pulo a tawen kalpasanna, nagbalin ti GDR a paset ti Federal Republic of Germany. Sipud idin inimbestigar dagiti opisial ti sumagmamano kadagiti awanan kinahustisia a naaramid iti dati a GDR ket inkagumaanda nga ipakat ti kinahustisia dagidiay manungsungbat. Maysa iti kasta nga awanan kinahustisia isut’ panangbista ti Korte Suprema kadagiti Saksi idi 1950.
Ni A. T., a 80 ti tawennan, ti maysa kadagiti tallo a hues a nangeddeng idi nausig ti siam a Saksi. Ita ta naidarum iti panangballikug iti hustisia, dimmatag iti sanguanan ti Regional Court idiay Berlin tapno ilawlawagna ti nagbalin a desisionna.
Iti sasaona iti korte, inamin ti dati a hues nga inukomna a nakabasol dagiti naakusar 45 a tawenen ti napalabas, nupay ad-adda a pinaboranna dagiti nalaglag-an a sentensia. Ngem ti kaso ti namagpanunot manen kenkuana. Apay? Indadanes ti Nazi dagiti Saksi ni Jehova kabayatan ti maikadua a gubat sangalubongan gapu ta nagkedkedda a mangsuporta ken Hitler. Kalpasan ti gubat naidadanes manen dagiti Saksi, nga itan babaen iti Komunista a turay. Daytoy ti “namagleddaang unay” iti hues.
Imbaga ni Lothar Hörnig iti korte a nakabusbos iti lima ket kagudua a tawen iti bartolina ket sa la nawayawayaan iti pagbaludan idiay Brandenburg idi 1959. Idi nangngeganna ti sasao ni Hörnig, nakasangit ti dati a hues. “Dispensarennak,” insaibbekna. “Pakawanennak kadi.” Inawat ni Hörnig ti panagpadispensarna.—Idiligyo ti Lucas 23:34.
[Picture Credit Line iti panid 32]
Neue Berliner Illustrierte