Liwliwa Bayat ti Uppat a Tawen a Gubat
KABAYATAN ti uppat a tawen a gubat iti teritoria ti dati a Yugoslavia, adu a tattao ti naglak-am iti rigat ken nakaro a kinakirang. Karaman kadakuada ti ginasut a Saksi ni Jehova, a simamatalek a nagtultuloy a nagdaydayaw iti “Dios ti amin a liwliwa.”—2 Corinto 1:3.
Idiay Sarajevo, nanayonan ti panagsagaba dagiti agnanaed iti dakkel a siudad a nabegbeg iti gubat. Kurang ti koriente, danum, pagsungrod, ken taraon. Ania ti inaramid ti Kongregasion dagiti Saksi ni Jehova idiay Sarajevo kadagitoy a nakaro a kasasaad? Inrisgo dagiti Kristiano kadagiti kabangibang a daga ti biagda a nangyeg iti nawadwad a saranay. (Kitaenyo Ti Pagwanawanan, Nobiembre 1, 1994, panid 23-7.) Kasta met, nagraranudan dagiti kakabsat idiay Sarajevo ti adda kadakuada, nga impangpangrunada ti panangiranud kadagiti naespirituan a banag. Bayat ti gubat, impadamag ti maysa a Kristiano a manangaywan iti dayta a siudad:
“Napateg unay kadakami dagiti gimong. Sangapulo ket lima a kilometro [9 milia] ti pagraenmi ken baket, agraman dagiti 30 pay a tattao, a mapan kadagiti gimong. No dadduma iyanunsioda nga abastuandakami iti danum no tiempo a maangay dagiti gimong. Ania ti aramiden dagiti kakabsat? Agur-urayda ngata idiay balayda wenno makigimongda? Kinaykayat dagiti kakabsattayo ti makigimong. Kanayon nga agtitinnulong dagiti kakabsat; iranudda ti aniaman nga adda kadakuada. Adda babai a kakongregasionanmi nga agnanaed iti nasulinek a paset ti siudad, iti asideg ti kabakiran; isu a nalaklaka bassit a makaala iti pagsungrod. Agtartrabaho pay iti maysa a panaderia, ket arina ti sueldona. No la ket ta mabalinanna, mangluto iti dakkel a tinapay ket iyegna iti gimong. Kalpasan ti gimong, no rummuaren dagiti timmabuno, ikkanna ti tunggal maysa iti bingayna.
“Nasken a marikna koma dagiti kakabsat nga awan nabaybay-an. Awan ti makaammo no asino kadakami ti sumarunonto a makasapul iti tulong no dumteng ti dakes a situasion. Idi nayelo dagiti dalan ket agsakit ti maysa a kabsat a babai, dagiti agtutubo, napigsa a kakabsat ti nangipasagad kenkuana tapno makigimong.
“Nakiramankami amin iti panangasaba, ket binendisionan ni Jehova ti panangikagumaanmi. Nakitana ti nakakaasi a kasasaadmi idiay Bosnia, ngem binendisionannakami iti irarang-ay—irarang-ay a dikam pay nakitkita sakbay ti gubat.”
Kasta met, iti sabali pay a binegbeg ti gubat a paset ti dati a Yugoslavia, tinagiragsak dagiti Saksi ni Jehova ti irarang-ay iti laksid dagiti nakaro a pakarigatan. Kastoy ti impadamag ti opisina dagiti Saksi ni Jehova idiay Croatia maipapan iti maysa a grupo dagiti Saksi: “Narigat unay ti kasasaad dagiti kakabsat nga agnanaed iti Velika Kladuša. Namin-adu a naraut ti ili. Nasken nga ilawlawag dagiti kakabsat nga awan dasdasiganda kadagiti soldado a Croatiano, Serbiano, ken nadumaduma a buyot dagiti Muslim. Talaga nga adu ti inibturanda—pannakaibalud, pannakakabkabil, bisin, panagngangabit ken patay. Kaskasdi, nagtalinaedda amin a matalek ken addaan iti naisangsangayan a pribilehio a makakita iti pamendision ni Jehova kadagiti aktibidadda.”
Iti laksid dagitoy a pakarigatan, agtultuloy a tagtagiragsaken dagiti Saksi ni Jehova iti Velika Kladuša ken iti kabangibangna a Bihać ti irarang-ay bayat a sireregta nga iranranudda ti makaliwliwa a mensahe ti Dios kadagiti kaarrubada. Dagiti 26 nga agibumbunannag iti Pagarian kadagitoy dua a lugar mangikonkonduktada iti 39 a panagadal iti Biblia iti pagtaengan!