Report Dagiti Manangiwaragawag ti Pagarian
“Agsilnag Koma ti Silawyo iti Sanguanan Dagiti Tattao”
Iti Sermonna iti Bantay, kinuna ni Jesus kadagiti adalanna: “Dakayo ti silaw ti lubong.” Intuloyna nga indagadag kadakuada: “Agsilnag koma ti silawyo iti sanguanan dagiti tattao, tapno makitada dagiti nasayaat nga aramidyo ket mangipaayda ti dayag iti Amayo nga adda iti langlangit.”—Mateo 5:14-16.
Mapalpaliiw dagiti nasayaat nga aramid dagiti Saksi ni Jehova idiay Italia. Kas pagarigan, maidaydayaw ti Dios gapu iti nasayaat a kababalinda no tumabtabunoda kadagiti tinawen a kombension, kas pasingkedan dagiti sumaganad a report:
▪ Iti adu a tawen tinultulongan ti maysa a babai idiay Terni, Italia, ti anakna a babai a mangimanehar iti maysa a restawran iti asideg ti estadium iti dayta a siudad. Isalaysayna: “Nakitak ti dakkel a naggidiatan dagidiay umay agbuya iti soccer ken dagiti delegado kadagiti kombension dagiti Saksi ni Jehova sadiay. Nataktakneng ti panagkawkawes dagiti Saksi, ken mapagpiaran ken nadayawda. Masansan a masmasdaawak no kasano a makapaglalangen a naimbag dagiti tattao a nadumaduma ti pulida.
“Maysa nga aldaw pinasardengnak ti maysa a Saksi iti lansangan ket dinamagna no ammok ti nagan ti Dios. Diak ammo, ket yantangay ammok a nasayaat a tattao dagiti Saksi ni Jehova, immanamongak iti isasarungkarna kaniak. Adut’ saludsodko maipapan iti kasasaad dagiti natay, a sinungbatanna manipud iti Biblia. Awan panagalikakak, immanamongak a mayadalan iti Biblia, ket dua a lawas kalpasanna rinugiakon ti tumabuno kadagiti gimong.
“Idi damo sinupiatnak ti anakko, ngem ti kababalin ken determinasionko ti nangbalbaliw iti panangmatmatna. Nakipagadalak iti siam a bulan. Ita ti anakko ken ni lakayna ap-apresiarendan dagiti Saksi a mapmapan iti restawranda. No siak, nabautisaranak iti maysa a kombension iti daytoy nga estadium.”
▪ Kalpasan ti maysa a kombension idiay Roseto degli Abruzzi, kinuna ti maysa a mangimatmaton iti kampo: “Napaliiwko a mapagpiaran unay dagiti Saksi ni Jehova iti amin nga aramidda. Itay napan a lawas, 40 kadakuada ti immay iti kampok, ket awan a pulos ti parikut a pinataudda. Imbes ketdi, isuda ti kakaisuna a tattao nga umay ken mangibaga kenka no adda nainayon a kaduada nga agnanaed iti trailer wenno toldada. Para kaniak, isuda ti kasayaatan a parokiano.”
▪ Kalpasan ti isu met laeng a kombension, kinuna ti maysa a manedyer ti otel: “Natalna amin a Saksi ni Jehova. Saanda a narasaw, ken nasapada a maturog. Pudno a naasi, mapagpiaran, ken nasingpetda. Anian a nakasaysayaat koma no amin a tattao ket kas kadakuada. Dagiti sabsabali takawenda amin a banag—dagiti plorera, pagarsangan, uray toilet paper ken asukar! Awan pay kasta a napasamak kadakayo. No mangala dagiti annakyo iti sorbetes iti reprihiradora iti rabii, diak pagparikutan ti mangsukimat no ania ti innalada. Kuentaenda ti utangda kaniak ken agbayadda a dagus. Pagtalkak unay ida. Anian a nakasaysayaat koma no kasta met dagiti sabsabali! Saksi ni Jehova la koma amin a bisitak.”
Agdindinamag dagiti Saksi ni Jehova idiay Italia, a kas iti adu a sabsabali pay a paset ti daga. ‘Tagtaginayonenda a nasayaat ti kababalinda iti tengnga dagiti nasion’ ket iti kasta idaydayawda ti pudno a Dios, a makinnagan iti aw-awitenda.—1 Pedro 2:12.