Apay a Dikay Makitaripnong Kadakuada?

ITAY napan a tawen, agarup 450 a kilometro ti dinaliasat ni Ndjaukua Ulimba, nga agtawen iti 73. Pinagnana ti intero a distansia iti las-ud ti 16 nga aldaw.

Nagna iti nawatiwat daytoy a lakay tapno dumar-ay iti maysa kadagiti tinawen a kombension dagiti Saksi ni Jehova. Nalapunos iti rag-o ken napatibker iti naespirituan kalpasan ti kombension, nagna manen a nagawid iti las-ud ti 16 nga aldaw. Bambannog laeng kadi daytoy? Saan! Ar-aramiden ni Ndjaukua Ulimba daytoy tinawen a panagdaliasat iti sumagmamanon a tawen.

Maysa daytoy nga Africano kadagiti nasurok a 15 milion manipud iti nasurok a 230 a dagdaga a dimmar-ay kadagiti kombension dagiti Saksi ni Jehova iti napalabas a tawen. Siempre, saan a nagnagna iti sumagmamano nga aldaw dagiti kaaduan a napan iti kombension. Dimtengda babaen iti kotse, bus, tren, wenno eroplano. Maysaka kadi kadakuada?

Iti 1998, kaaduan kadagiti kombension iti intero a lubong ti maangayto iti kalgaw. No ipalubos ti salun-atna, mabalin a pagnaen manen ni Ndjaukua Ulimba ti isu met laeng a distansia tapno makatabuno. Mangngegannanto ken dagiti minilion a dadduma pay ti praktikal, makapatibker-pammati, ken makapabileg a programa. Kadagiti amin a tumabuno, ti kombensionto ti tampok iti tawen. Sibabara nga awisendakayo met a tumabuno. Maragsakan dagiti Saksi ni Jehova iti lugaryo a mangibaga iti pakaangayan ti kombension a kaasitgan kadakayo.