Mangyeg iti Dayaw ti Nasayaat a Kondukta
Ti La Gazzetta del Mezzogiorno a pagiwarnak iti Italia kinomendaranna dagiti Saksi ni Jehova iti panangipablaakda iti artikulo a “Matera—Siudad Dagiti Naisangsangayan a Kueba a Pagtaengan.” Nagparang daytoy nga artikulo iti Hulio 8, 1997 a ruar ti magasin nga Agriingkayo! a sisasaknap a naiwaras iti adu a pagsasao. Agdama a maipatpatarus ti Agriingkayo! iti 81 a pagsasao ken addaan sirkulasion a nasurok a 19 a milion a kopia iti intero a lubong. Kinuna ti pagiwarnak nga iti kalgaw naragpat ti Agriingkayo! ti kangatuan a bilang “no maipapan iti kampania a panangiwarnak iti tawid maipapan iti historia ken arte ti siudad [ti Matera].”
Indayaw ti pagiwarnak dagiti Saksi mainaig iti “Pammati iti Sao ti Dios” a Kombension Distrito a naangay idiay Matera idi 1997. Kinuna ti artikulo a “napagtitipon dagiti [Saksi] ti 4,000 a tattao iti XXI Settembre Stadium [ti siudad] iti katengngaan ti kalgaw ken iti kainaran; inasikasoda ti pannakadalus, pannakapintura manen, ken ti kasapulan a panangpasayaat iti daytoy sentro ti pagay-ayaman (nangruna dagiti pasilidad ti kasilias) nga awan a pulos bayadna, a ginastosanda a mismo ti pannakagatang dagiti kasapulan a materiales.”
Ikagkagumaan dagiti Saksi ni Jehova ti agbalin a nasayaat a kaarruba. (Mateo 22:37-39) Sursurotenda met ti Nainkasuratan a balakad a: “Taginayonenyo a nasayaat ti kababalinyo iti tengnga dagiti nasion, tapno . . . dayawenda koma ti Dios iti aldaw a panangsukimat[na] kas bunga ti nasayaat nga ar-aramidyo a masaksianda.”—1 Pedro 2:12.