Natay Kadi ni Maria iti Natural a Pakaigapuan?

SIGUN iti pagiwarnak a L’Osservatore Romano ti Vatican, kuna ti Katoliko a doktrina ti Asuncion: “Ti Imaculada a Birhen, a di natulawan iti orihinal a basol, ket naipangato nga addaan bagi ken kararua iti nailangitan a dayag, idi a nagngudo ti biagna ditoy daga.” Daytoy a sursuro ti nangituggod iti sumagmamano a teologo a Katoliko nga agkuna a ni Maria “saan a natay sa dagdagus a naibangon manipud naindagaan a biag iti nailangitan a dayag,” kuna ti pagiwarnak.a

Itay nabiit, naigidiat ti inlawlawag ni Papa Juan Paulo II maipapan iti daytoy a banag. Kinunana iti General Audience idiay Vatican idi Hunio 25, 1997: “Awan ipaay ti Baro a Tulag nga impormasion maipapan kadagiti napasamak iti ipapatay ni Maria. Daytoy a kinaulimek ituggodna ti maysa a mangipapan a natural ti pannakapagteng daytoy, ket awan detalye a napateg a dakamaten. . . . Kasla awan pakaibatayanna dagiti opinion nga isu ket saan a natay iti natural a pakaigapuan.”

Ti nadakamat ni Papa Juan Paulo ibutaktakna ti maysa a serioso a pakapilawan ti Imaculada Concepcion a sursuro. No ti ina ni Jesus ket “di natulawan iti orihinal a basol,” kasano koma a matay ni Maria iti “natural a pakaigapuan,” kas resulta ti basol nga impatawid ni managbasol nga Adan? (Roma 5:12) Daytoy narikut a doktrina ket gapu iti ballikug a panangmatmat ti Iglesia Katolika iti ina ni Jesus. Di pagsiddaawan a rimsua ti panagsisina ken pannakariro iti uneg ti Iglesia Katolika maipapan iti dayta a banag.

Nupay iladawan ti Biblia ni Maria a napakumbaba, matalek, ken napasnek, saanna nga ipagapu dagitoy a kalidad iti “imaculada concepcion.” (Lucas 1:38; Aramid 1:13, 14) Nalawag a kuna ti Biblia: “Amin nagbasol ken agkurang iti dayag ti Dios.” (Roma 3:23) Wen, tinawid ni Maria ti basol ken kinaimperpekto a kas met ti intero a sangatauan, ket awan ebidensia nga isu, saan a natay iti natural a pakaigapuan.​—Idiligyo ti 1 Juan 1:8-10.

[Footnote]