Sipapakumbaba nga Iyaataday iti Dalan ni Jehova

Report Dagiti Manangiwaragawag iti Pagarian

Sipapakumbaba nga Iyaataday iti Dalan ni Jehova

“BIROKENYO ni Jehova, dakayo amin a naemma iti daga.” Inwaragawag ti Hebreo a mammadto a ni Sofonias daytoy nga awis nasurok a 26 a siglon ti napalabas, ket agingga ita, mayaw-awis pay laeng iti intero a daga. (Sofonias 2:3) Ania ti kayat a sawen ti panangbirok ken Jehova? Ti panangaramid iti daytoy ket mangrugi iti pananggun-od iti pannakaammo iti maymaysa a pudno ken sibibiag a Dios, ni Jehova.—Jeremias 10:10; Juan 17:3.

Nupay kasta, ti pananggun-od iti pannakaammo ket saan a mangiturong a mismo iti naanamongan a takder iti sanguanan ti Dios. Tapno anamongan ti Dios, nasken met nga iyaplikar ti maysa a tao daytoy a pannakaammo. Kasano? Babaen ti sipapakumbaba a panangyatadayna iti panunot ken konduktana kadagiti estandarte ti Dios, kas ipakita ti sumaganad a kapadasan manipud Suriname.—Efeso 4:22-24.

Ni Eddy, maysa a maestro nga ag-35 ti tawenna, ti mangil-iliw kadagiti makapnek a sungbat kadagiti saludsod nga: ‘Ania ti akem ti relihion iti agdama a kagimongan?’ ken ‘Agtunos kadi ti ibagbaga ti Biblia, maysa a daanen a libro, ken ti moderno a siensia?’ Idi nga immay dagiti Saksi ni Jehova ket impaayda dagiti naibatay-Biblia a sungbat kadagitoy a saludsod, nagimdeng a naimbag ni Eddy. Naginotar pay ketdi tapno mapaneknekanna no pudno dagiti eksplanasion dagiti Saksi.

Kasakbayanna, nakitimtimpuyog ni Eddy iti relihion a nangisuro kenkuana a dagiti tattao ket resulta ti panangbalbaliw ti Dios kadagiti bakes nga iti panaglabas ti tiempo nagbalin a tao. Isu nga idi intukon kenkuana dagiti Saksi ti publikasion a Life—How Did It Get Here? By Evolution or by Creation? dagus nga inawatna dayta. Nagustuanna ti nabatad a panangilawlawag ti libro iti salaysay ti Biblia maipapan iti panamarsua. Babaen ti panangadalna iti Biblia, kapkapnekanna a nasarakannan ti kinapudno!

Ngem ita naipasango iti maysa a pannubok. Nagindeg ni Eddy iti maysa a balay a ti panagtakaw ken panagulbod ket wagas ti panagbiag. Gapuna, nasken nga agpili: tuladenna ti rinuker a panagbiag dagiti kakuartona wenno ilaksidna ti kasta a kondukta ket pilienna ti estilo ti panagbiag a pakaidayawan ti Dios. Nainsiriban a pinili ni Eddy ti naud-udi. Insardengna amin a dakes a pannakitimpuyog ket pimmanaw iti dayta a balay.—1 Corinto 15:33, 34.

Napartak ti panagrang-ay ni Eddy kalpasan nga inrugina ti timmabuno kadagiti gimong iti Kingdom Hall. Simmayaat met ti panagkawkawes ken panaglanglangana ken inruginan nga imbaga kadagiti gagayyem ken kakabagianna no ania ti maad-adalna. Idi bumaybayag, nanayonan ti rag-ona idi a naanamongan a makiraman a mangikasaba iti “naimbag a damag” iti publiko. (Mateo 24:14; Aramid 20:20) Idi Disiembre 1996 dimteng ti aldaw a nabayagnan nga inur-uray idi nga insimbolona ti dedikasionna ken Jehova babaen ti panagpabautisar iti danum.

Tinawen, patpatgan dagiti ginasut a ribu a nasingpet-panagpuspusona a tattao ti awis a “birokenyo ni Jehova.” Iti panangaramidda iti dayta, mapasaranda ti kinapudno ti Proverbio 22:4, a kunana: “Ti gunggona ti napakumbaba ken panagbuteng ken Jehova, kinabaknang, dayaw, ken biag.” Wen, babaen ti sipapakumbaba nga iyaataday iti dalan ni Jehova, sagsagrapen itan dagiti mangipatpateg iti kinapudno dagiti bendision, ken sitatalek a mangnamnamada iti agnanayon a bendision ditoy daga a mismo.—Salmo 37:29.

[Dagiti Mapa iti panid 18]

(Para iti aktual a pannakaurnosna, kitaem ti publikasion)

Baybay Caribe

GUYANA

SURINAME

FRENCH GUIANA

BRAZIL

[Credit Line]