Ti Gubat a Nangdadael iti Maika-19 a Siglo

1914

ITI panangut-utobna iti baro a milenio, insurat ni Charley Reese, kolumnista ti pagiwarnak a The Orlando Sentinel: “Di pay naggibus ti gubat idi 1914-18 a nangdadael iti maika-19 a siglo.” Ania ti kayatna a sawen? Inlawlawagna: “Ti petsa dina iturayan ti historia. Ti maika-19 a siglo​—nadepinar a buklen dagiti patpatien, pagarup, kababalin ken moral​—saan a nagpatingga idi Ene. 1, 1901. Nagngudo dayta idi 1914. Dayta met ti panangrugi ti maika-20 a siglo, a nadepinar met la a kasta. . . .

“Nagtaud iti dayta a gubat ti gistay amin a dangadang a pakaseknantayo iti intero a panagbiagtayo. Namunganay iti dayta a gubat ti dandani amin a pagduyosan ti saririt ken kultura iti panagbiagtayo. . . .

“Ti kunak, kasta ti perdi nga inyeg [ti Gubat Sangalubongan I] gaput’ panangrebbekna iti panamati ti tao a makontrol dagiti tattao ti pagtungpalanda. . . . Ti gubat ti gapuna a tinallikudan dagiti tattao ti ubbaw a pammatida. Awan iti agsumbangir a dasig ti nakaamiris a kasta ti pagbanaganna. Dinuprakna dagiti imperio ti Britania ken Francia. Inkisapna dagiti kasasayaatan ti maysa a sibubukel a kaputotan dagiti Briton, Pranses ken Aleman a lallaki. . . . Iti las-ud ti ababa a tiempo, inkisapna ti 11 milion a tattao.”

Nasurok a 120 a tawenen nga impakaammo dagiti Saksi ni Jehova a nagpatingga idi 1914 ti inawagan ni Jesus a “naituding a pampanawen dagiti nasion.” (Lucas 21:24) Iti dayta a tawen, ti napagungaren ken naipadayag a ni Jesus-Kristo ket naisaad kas Ari iti nailangitan a Pagarian. Babaen iti dayta a Pagarian, permanentento a pukawen ni Jehova a Dios amin a panagsagsagaba iti daytoy a siglo.​—Salmo 37:10, 11; Eclesiastes 8:9; Apocalipsis 21:3, 4.

[Picture Credit Line iti panid 32]

Retrato a naggapu iti U.S. National Archives