Agaluadkayo iti Simonia!
MARARAEM unay idi ni Simon a taga Samaria idiay ilida. Nagbiag ni Simon idi umuna a siglo K.P., ket nagsidsiddaawan dagiti tattao ti laingna nga agsalamangka ket kunkunada maipapan kenkuana: “Daytoy a lalaki isu ti Pannakabalin ti Dios, a mabalin a maawagan Dakkel.”—Aramid 8:9-11.
Ngem idi nabautisaranen kas Kristiano, nabigbig ni Simon nga adda pannakabalin a nabilbileg ngem ti sigud nga iparparangna. Pannakabalin dayta a naiburay kadagiti apostol ni Jesus, ket nabaelanda nga iranud kadagiti dadduma dagiti namilagruan a sagut ti nasantuan nga espiritu. Nagamanga unay ni Simon nga urayna la inopreseran iti kuarta dagiti apostol sana kiniddaw: “Itedyo met kaniak daytoy a kinaturay, tapno ti asinoman a pangipatayak kadagiti imak awatenna ti nasantuan nga espiritu.”—Aramid 8:13-19.
Tinubngar ni apostol Pedro ni Simon, a kinunana: “Mapukaw koma ti pirakmo a maikanunong kenka, agsipud ta pinanunotmo a babaen iti kuarta matagikuam ti awan bayadna a sagut ti Dios. Awan pasetmo wenno uray bingaymo itoy a banag, ta ti pusom saan a nalinteg iti imatang ti Dios.”—Aramid 8:20, 21.
Daytoy a salaysay ti Biblia ti nagtaudan ti sao a “simonia,” a nadepinar kas “ti basol a pananggatang wenno panangilako kadagiti saad wenno promosion iti iglesia.” Ti New Catholic Encyclopedia annugotenna a nangruna idi maika-9 agingga iti maika-11 a siglo a “nagraira ti simonia kadagiti monasterio, nababbaba a klero, obispo, ken uray pay kadagiti papa.” Kastoy ti kuna ti maikasiam nga edision ti The Encyclopædia Britannica (1878): “No adalen ti historia maipapan ti nalmeng a pannakabutos dagiti Papa makombinsir ti estudiante nga awan pay pulos naangay nga eleksion a di namulitan iti simonia, a ti kaaduan a kaso ti simonia kadagita a panagbubutos isuda dagiti kakaruan, nakababain unay, ken kabubulgaran a kita.”
Masapul nga agannad dagiti pudno a Kristiano itatta iti simonia. Kas pagarigan, baka adda dagidiay agsobsobra ti panangpadayawda wenno nabuslon ti panagregaloda kadagidiay makabalin a mangited kadakuada iti kanayonan a pribilehio. Iti kasumbangirna, dagidiay makabalin a mangited iti kakasta a pribilehio mabalin a paboranda dagidiay makabael—ken masansan sigagagar—a mangiburay kadakuada kadagiti regalo. Agpada a saklawen ti simonia dagita a situasion, ket ti Kasuratan nalawag a kondenarenna ti kasta nga aramid. “Ngarud, agbabawika iti daytoy a kinadakesmo,” indagadag ni Pedro ken Simon, “ket umararawka ken Jehova tapno, no mabalin, ti gandat ta pusom [“daytoy a gakatmo,” New Jerusalem Bible] mapakawan kenka; ta makitak a maysaka a makasabidong nga apro ken kawar ti kinakillo.”—Aramid 8:22, 23.
Makaparagsak ta nabigbig ni Simon ti kinaserioso ti dakes a tarigagayna. Nagpakaasi kadagiti apostol: “Umararawkayo ken Jehova maipaay kaniak tapno awan koma kadagiti bambanag a sinaoyo ti mapagteng kaniak.” (Aramid 8:24) Dagiti pudno a Kristiano a mangipangag iti napateg a leksion iti daytoy a salaysay ikagumaanda a di mamulitan iti simonia.